فۋتبولدان قازاقستان چەمپيوناتى بەسٸنشٸ تۋرىنىڭ العاشقى ەكٸ ويىنى ٶتتٸ, دەپ حابارلايدى "ۇلت اقپارات".
الدىمەن پەتروپاۆل قالاسىندا جەرگٸلٸكتٸ «قىزىلجار» «اقتٶبە» كومانداسىن قابىلدادى.
وسىعان دەيٸن جەڭٸلٸپ كٶرمەگەن الاڭ يەلەرٸ بٸرٸنشٸ بولىپ ەسەپ اشتى. شابۋىلعا قوسىلعان بەلورۋس قورعاۋشىسى ۆالەريي كارشاكەۆيچ 66-مينۋتتا مەرگەندٸك تانىتتى.
دەگەنمەن اقتٶبەلٸكتەر ويىنعا تىڭنان قوسىلعان فۋتبولشىلاردىڭ كٶمەگٸمەن ماتچ سوڭىندا جەڭٸستٸ جۇلىپ الدى. الدىمەن 90-مينۋتتا ديدار جالمۇقان تارازى باسىن
تەڭەستٸردٸ. ال 93-مينۋتتا ريفات نۋرمۋگامەت ەسەپتٸ 2:1-گە جەتكٸزدٸ.
ال ٶتكەن تۋردا «تارازدان» 0:4 ەسەبٸمەن ويسىراي ۇتىلعاننان كەيٸن «شاحتەردٸڭ» باس باپكەرٸ الي اليەۆ ورنىنان كەتٸپ, ۋاقىتشا جاتتىقتىرۋشى مٸندەتٸن اتاقتى فۋتبولشى اندرەي فينونچەنكو قولعا العان بولاتىن.
ٶز الاڭى جارامسىز بولعاندىقتان, قاراعاندىلىق كلۋب پەن «اقجايىقتىڭ» ماتچى ەلورداداعى «استانا ارەنا» ستاديونىندا ٶتتٸ.
كەزدەسۋ قاراعاندىلىقتار ٷشٸن سەتسٸز باستالدى.
«اقجايىقتىڭ» شابۋىلشىسى ۆياچەسلاۆ شۆىرەۆپەن سوقتىعىسىپ قالعان «شاحتەردٸڭ» قاقپاشىسى يگور شاتسكيي جاراقات الىپ, ورنىنا تيمۋربەك زەكٸروۆ شىقتى.
بٸرٸنشٸ تايم سوڭىنا قاراي, 39-مينۋتتا قارسى شابۋىل كەزٸندە رەسەيلٸك ەۆگەنيي كوزلوۆتىڭ ت.زەكٸروۆتەن اسىرا سالعان دوبىن گانالىق قورعاۋشى گيدەون باا ٶز قاقپاسىنا توعىتتى. دەگەنمەن 44-مينۋتتا ايدوس تەتتٸباەۆ قارىمتا گول سوقتى – 1:1.
ەكٸنشٸ تايمدا 73-مينۋتتا قوناقتار ايىپ دوبىن ورىندادى.
وسى سەتتە تاعى بٸر قاراعاندىلىق قورعاۋشى داۆيد اتاناسكوسكي ٶز قاقپاسىنا گول سوعىپ الدى.
سٶيتٸپ سەتتٸلٸك سەرٸك بولعان «اقجايىق» 2:1 ەسەبٸمەن جەڭٸسكە جەتتٸ.
بۇدان كەيٸن اقتٶبەلٸكتەر 9 ۇپايمەن تۋرنير كەستەسٸندە ەكٸنشٸ, ورالدىقتار سەگٸزٸنشٸ ورىنعا كٶتەرٸلدٸ.
18 سەۋٸر كٷنٸ ٶتەتٸن التىنشى تۋردا «اقتٶبە» «شاحتەردٸ» قابىلداسا, «اقجايىق» سىرت الاڭدا «تارازبەن» وينايدى.
