Fýtboldan Qazaqstan chempionatynyń 15-týrynda Oraldyń «Aqjaiyǵy» óz alańynda Shymkenttiń «Ordabasy» komandasyn qabyldady, dep habarlaidy "Ult aqparat".
Oraldyqtar osyǵan deiin qatarynan eki matchta jeńilis taýyp, jaǵdaiyn qiyndatyp alǵan edi.
Shymkenttikter de sońǵy jeti týrda jeńis dámin tatpaǵandyqtan, qos komandaǵa da úsh upai aýadai qajet bolatyn.
Birinshi taimda «Aqjaiyq» sapyndaǵy ýkrainalyq shabýylshy Nikolai Kovtaliýk eki márte urymtal sátti múlt jiberdi. Oiyn sońyna taman onyń ornyna shyqqan reseilik Dmitrii Michýrenkov ta túk bitire alǵan joq. Esesine 92-minýtta «Ordabasynyń» surmergeni, braziliialyq Joao Paýlonyń alystan tepken doby «Aqjaiyq» qaqpasynan bir shyqty.
Osylaisha sońǵy bes kezdesýde teń oinaǵan qonaqtar 1:0 esebimen jeńiske jetti.
Birinshi ainalymda da Shymkentte alań ieleri utylyp jatyp, qosymsha minýttarda eki gol soǵyp, oraldyqtardy qapy qaldyrǵan edi.
Týrnir kestesinde altynshy orynǵa syrǵyǵan «Aqjaiyq» sońǵy úsh matchta qarsylastar qaqpasynyń kiltin taba almai keledi. Bul shabýyl shebinde urymtal sátte match taǵdyryn sheship ketetin Joao Paýlodai sheber fýtbolshynyń joqtyǵyn kórsetedi.
Ýkrainalyq maman Vladimir Maziardyń shákirtteri kelesi oiynyn 18 maýsym kúni Petropavlda jergilikti «Qyzyljarmen» ótkizedi.
