فۋتبولدان قازاقستان چەمپيوناتىنىڭ 15-تۋرىندا ورالدىڭ «اقجايىعى» ٶز الاڭىندا شىمكەنتتٸڭ «ورداباسى» كومانداسىن قابىلدادى, دەپ حابارلايدى "ۇلت اقپارات".
ورالدىقتار وسىعان دەيٸن قاتارىنان ەكٸ ماتچتا جەڭٸلٸس تاۋىپ, جاعدايىن قيىنداتىپ العان ەدٸ.
شىمكەنتتٸكتەر دە سوڭعى جەتٸ تۋردا جەڭٸس دەمٸن تاتپاعاندىقتان, قوس كومانداعا دا ٷش ۇپاي اۋاداي قاجەت بولاتىن.
بٸرٸنشٸ تايمدا «اقجايىق» ساپىنداعى ۋكراينالىق شابۋىلشى نيكولاي كوۆتاليۋك ەكٸ مەرتە ۇرىمتال سەتتٸ مٷلت جٸبەردٸ. ويىن سوڭىنا تامان ونىڭ ورنىنا شىققان رەسەيلٸك دميتريي ميچۋرەنكوۆ تا تٷك بٸتٸرە العان جوق. ەسەسٸنە 92-مينۋتتا «ورداباسىنىڭ» سۇرمەرگەنٸ, برازيلييالىق جواو پاۋلونىڭ الىستان تەپكەن دوبى «اقجايىق» قاقپاسىنان بٸر شىقتى.
وسىلايشا سوڭعى بەس كەزدەسۋدە تەڭ ويناعان قوناقتار 1:0 ەسەبٸمەن جەڭٸسكە جەتتٸ.
بٸرٸنشٸ اينالىمدا دا شىمكەنتتە الاڭ يەلەرٸ ۇتىلىپ جاتىپ, قوسىمشا مينۋتتاردا ەكٸ گول سوعىپ, ورالدىقتاردى قاپى قالدىرعان ەدٸ.
تۋرنير كەستەسٸندە التىنشى ورىنعا سىرعىعان «اقجايىق» سوڭعى ٷش ماتچتا قارسىلاستار قاقپاسىنىڭ كٸلتٸن تابا الماي كەلەدٸ. بۇل شابۋىل شەبٸندە ۇرىمتال سەتتە ماتچ تاعدىرىن شەشٸپ كەتەتٸن جواو پاۋلوداي شەبەر فۋتبولشىنىڭ جوقتىعىن كٶرسەتەدٸ.
ۋكراينالىق مامان ۆلاديمير مازياردىڭ شەكٸرتتەرٸ كەلەسٸ ويىنىن 18 ماۋسىم كٷنٸ پەتروپاۆلدا جەرگٸلٸكتٸ «قىزىلجارمەن» ٶتكٸزەدٸ.
