Frilanserlerdiń qyzmetin tsifrlyq formatqa ótkizý maqsatynda «platformalyq jumys» elektrondyq servisin ázirlenedi. Bul týraly Úkimet otyrysynda QR Eńbek jáne halyqty áleýmettik qorǵaý ministri Serik Shápkenov aitty, dep habarlaidy QazAqparat tilshisi.
«Búgingi kúni eńbek naryǵynda 300 myńǵa jýyq ózin-ózi jumyspen qamtyǵandar azamattyq kelisimsharttar negizinde jumys atqarýda. Tapsyrys berýshiler men oryndaýshylardyń arasyndaǵy qarym-qatynas - kúrdeli protsess. Sondai-aq, sheteldik jumys kúshiniń quramynda 60 paiyzǵa jýyǵy jumysshy mamandyqtary boiynsha tartylady. Osy máselelerdi eskere otyryp birinshiden, ministrlik frilanserlerdiń qyzmetin tsifrlyq formatqa ótkizý maqsatynda «platformalyq jumys» elektrondyq servisin ázirleidi. Bul ártúrli platformalarda óz betinshe jumys isteitin azamattardyń qyzmetin ońai tirkeýge, qajet mamandardy tez arada tabýǵa, eńbek quqyqtaryn qorǵaýǵa jáne tapsyrys berýshilermen qarym-qatynasty resmi túrde rásimdeýge múmkindik beredi», - dedi ministr.
Onyń atap ótýinshe, ekinshiden, 3 jáne 4 sanattar boiynsha sheteldik jumys kúshin tartýǵa arnalǵan kvota 4,7 myń adamǵa qysqartylady. Úshinshiden, jańa jumys oryndarynyń qurylýy óńirlik jumyspen qamtý kartalaryn ózektendirý jáne aqparattyq júieni turaqty túrde jańartý arqyly monitoringilenetin bolady.
«Atalǵan is-sharalar halyqtyń jumyspen qamtylý deńgeiin arttyrýǵa jáne ishki eńbek naryǵyn qorǵaýǵa múmkindik beredi», - dedi Serik Shápkenov.
