Ózin-ózi jumyspen qamtýshylar kelesi aptadan bastap zeinetaqy qoryna zeinetaqy jarnasyn aýdara alady. Bul týraly búgin eńbek jáne halyqty áleýmettik qorǵaý ministri Madina Ábilqasymova málimdedi, dep habarlaidy Sputnik Qazaqstan tilshisi.
Ministrdiń aitýynsha, zeinetaqy jarnasyn ár aidyń 25-ne deiin tóleý qajet.
"Búgin úkimet otyrysynda qaýlyǵa daýys berdi. Ol óz kúshine engen kezde, bul norma qoldanysta bolady. Apta sońyna deiin kúshine enedi dep oilaimyn. Kelesi aptadan bastap zeinetaqy jarnasyn tólei berýge bolady. Jarna ár aidyń 25-ne deiin tólenýi kerek", — dedi Ábilqasymova úkimet kýlýarynda.
Ol barlyq bank azamattardan tólem qabyldaýǵa daiyn ekenin atap ótti.
"Biz júieniń daiyndyǵyn taǵy da qosymsha tekserip shyqtyq. "Azamattarǵa arnalǵan úkimet" memlekettik korporatsiiasy tolyǵymen daiyn ekenin habarlady, tólem belgileýdiń barlyq kody bar. Barlyq qyzmetkerge eskertildi. Tólem "Azamattarǵa arnalǵan úkimet" shotyna bankter arqyly júrgiziledi, odan ári memlekettik korporatsiia ony zeinetaqy qoryna aýdarady. Sondai-aq BJZQ barlyq negizgi bankterge rekvizit shottary kórsetilgen hat jiberdi, barlyq bank daiyndyǵyn rastady", — dedi ministr.
Qandai da bir qiyndyq týyndasa, ózin-ózi jumyspen qamtýshylar Azamattarǵa arnalǵan úkimet (1414) pen "BJZQ"AQ (1418) call-ortalyqtaryna habarlasa alady.
Eske sala ketsek, osy jyldyń shildesinde azamattyq-quqyqtyq sipattaǵy kelisimshart boiynsha jumys isteitin jeke tulǵalardy Biryńǵai jinaqtaýshy zeinetaqy qoryna jarna aýdarýǵa mindetteitin zań qabyldanǵan edi.
