Frantsiia Parlamentiniń senaty Úkimettiń Frantsiiany 11 mamyrdan bastap karantinnen shyǵarýǵa baǵyttalǵan josparyna kelispedi.
Senattyń 89 múshesi qarsy daýys berip, 81-i qoldady, 174-i qalys qaldy. Qarsy bolǵandar – sotsialister men kommýnister, qalys qalǵandardyń kópshiligi respýblikashyldar. "Alǵa, Respýblika" bilik partiiasy premer - ministrdiń usynysyn biraýyzdan qoldaǵan.
Ótken aptada parlamenttiń tómengi palatasy - ulttyq assambleia úkimet basshysynyń josparyn quptaǵan.
Mamyrdyń tórtine úkimet Frantsiiany karantinnen shyǵarý jobasyn senatqa usynyp, karantin rejimin ári qarai saqtaý múmkin emestigin málimdegen edi. Premer-ministrdiń sózinshe, týrizm, óner, gastronomiia salasynyń jumysy toqtap qalǵan. Karantin jalǵasa berse, ekonomikanyń damýy tejelip, Frantsiianyń aýyl sharýashylyǵy men investitsiialyq tartymyna nuqsan keltiredi.
Úkimet josparyna qaraǵanda, eger karantindi toqtatqannan keiin alǵashqy aptada sanitariia jaǵdaiy nasharlamasa 29 mamyrdan bastap dini qulshylyq rásimine de ruqsat berýge bolady.
Senattyń úkimet josparyn qoldamaǵany Covid-19 indeti jaily resmi málimetter jariialanatyn ýaqytpen tuspa-tus kelgen. Bul málimetterge qaraǵanda, sońǵy táýlikte indet saldarynan ólgender burynǵydan 306 adamǵa kóbeigen, al koronavirýstan ólgenderdiń jalpy jiyntyǵy 25 myńnan asqan. Koronavirýs juqtyrǵandar Frantsiiada 170 myń adamǵa jetken.
