Frantsiialyq jýrnalister Sozaq jerin aralap júr. Sheteldik tilshiler Sozaqtaǵy kásiporyndardyń, sonyń ishinde qazaq-frantsýz birlesken kompaniianyń jumysymen tanysyp, olardyń áleýmettik salaǵa kórsetip otyrǵan qoldaýyn keń aýqymda nasihattamaq, dep habarlaidy Ult.kz tilshisi QazAqparat portalyna silteme jasap.
Frantsiialyq jýrnalister aldymen «Katko BK» JShS birlesken qazaq-frantsýz kásipornynda boldy. 1996 jyly qurylǵan kásiporyn búginde Sozaq aýdanyndaǵy Moiynqum, Tórtqudyq ýran ken ornyn barlaýmen jáne óńdeýmen ainalysady. Atom ónerkásibinde ózindik ornyn alǵan kásiporyn jergilikti halyqqa áleýmettik kómek te kórsetip keledi. Bul kompaniia osy ýaqytqa deiin Sozaq aýdanyna jalpy somasy 1 mlrd 89 mln teńgege mektep, balabaqshalar salyp berdi. Mekemede 1289 qyzmetker jumys istese, onyń 52 paiyzy jergilikti turǵyndar.
«Katko» Qazaqstan-frantsýz birlesken kásiporny» álem boiynsha ýran óndirýden 1-orynda keledi. Biz Sozaq aýdany ákimdigimen jáne aýyl ákimderimen biznestiń áleýmettik baǵdarlamasy aiasynda tyǵyz bailanysta jumys jasaimyz. Sońǵy 5 jyldyń ishinde jastardy Frantsiiaǵa oqýǵa jiberip jatyrmyz. Jastarǵa kóp senim artýdamyz», - deidi seriktestiktiń bas direktory Jerar Fries.
Frantsýzdyq tilshiler taǵy birneshe óndiris ornyn aralap, Sozaq aýdanynyń búgingi tynys tirshiligimen tanysty. Aýyl turǵyndarymen sóilesip, aýdan basshylarymen júzdesti. Shaǵyn kásiporyndarǵa bas suǵyp, ondaǵy daiyn ónimderdi kórip shyqty.
«Men Qazaqstanǵa alǵash ret kelip turmyn. Mundaǵy halyqtyń qonaqjailylyǵy, tartymdylyǵy óte qatty unady. Munda bizge ýrannyń qalai óndiriletinin kórsetti. Aldaǵy ýaqytta Sozaq aýdanyndaǵy kásiporyndar týraly óz gazetterimizde jariialaimyz»,-deidi «La Provence» gazetiniń tilshisi Melodi Testi.
Óz kezeginde sheteldik tilshilermen kezdesken aýdan ákimi Salyhan Polatov jergilikti bilik pen halyqaralyq kompaniia tarapynan ekijaqty kelisim negizinde atqarylǵan jumystar jaiyn baian etti. «Katko» kompaniiasynyń basshylyǵy áleýmettik salaǵa áli de bolsa, kómek qolyn sozatynyn jetkizdi.
