Beisenbi kúni Frantsiianyń birneshe qalasynda ondaǵan myń jumysshy el Prezidenti Emmaniýel Makronnyń josparlaǵan zeinetaqy reformasyna narazylyq bildirý úshin kóshelerge shyqty. Oǵan muǵalimder, dárigerler, áýe dispetcherleri, temirjol jáne qoǵamdyq kólik jumysshylary qatysqan, dep habarlaidy The Local.fr saity.
Frantsiianyń Ishki ister ministrligi eldegi zeinetaqy reformalaryna qarsy demonstratsiialarǵa 800 myńǵa jýyq adam qatysqanyn rastady. Tek Parij kósheleriniń ózine ǵana 65 myń adam shyqqan. Al Kásipodaqtardyń málimetinshe, ereýilder men narazylyq sharalaryna qatysqandardyń sany anaǵurlym kóp – 1,5 million adam.
BBC News beisenbi kúni kóptegen týristik oryndar, onyń ishinde Eifel munarasy jabylǵanyn atap ótti. Parij politsiiasynyń habarlaýynsha, narazylyq bildirýshiler dúken vitrinalaryn syndyryp, qalanyń ár jerinde nysandardy órtegen. Olarǵa qarsy kóz jasaýratatyn gaz qoldanyldy.
Bul kúni kóptegen frantsýzdar jumysqa jáne úige jaiaý barýǵa májbúr boldy. Óitkeni qoǵamdyq kólik te, metro da jumys istemedi. Parijdegi metro jelileriniń kópshiligi tolyǵymen jabyldy. Aita ketý kerek, kúnine 4 million jolaýshy metro qyzmetin paidalanady. El áýejailarynda júzdegen reis toqtatyldy. Sondai-aq Frantsiianyń kóptegen mektepterinde sabaqtar bolǵan joq.
Aita keteiik, Frantsiiada sońǵy on jyl ishinde resmi zeinetke shyǵý jasy 60-tan 62-ge ózgertildi. Bul, Ekonomikalyq yqpaldastyq jáne damý uiymy elderi arasynda eń tómengi zeinettik jas. Mysaly, Ulybritaniiada zeinetke 66 jasta shyǵýǵa bolady. Al taiaý ýaqytta britandyqtar bul mejeni 67 jasqa kóterýdi josparlap otyr.
