Qazaqstandaǵy Frantsiia elshisi Filipp Martine elimizdegi prezidenttik basqarý júiesiniń 30 jyldyǵyna arnalǵan halyqaralyq konferentsiiada sóz sóiledi, dep habarlaidy QazAqparat.
«Bizdiń álem teńdessiz daǵdarysty bastan ótkerip jatyr. Pandemiia álemdi myqtap turyp tutqynyna aldy. Bizdiń elderimiz virýspen kúres júrgizip jatyr. Osynaý daǵdarystyń ekonomikalyq saldarynyń tolyq aýqymyn eseptep bilýdiń ózi múmkin emes. Keiingi kezde munai baǵasynyń qatty quldyraýyna kýá bolyp otyrmyz», - dedi Filipp Martine «Prezidenttik basqarý nysany. Konstitýtsiialyq negiz jáne saiasi tájiribe» atty halyqaralyq onlain-konferentsiiada.
Elshiniń aitýynsha, búkil álemde tiimdi vaktsina bolmasa, adamzattyń alǵa jyljýynyń ózi úlken máselege ainalyp otyr.
«Osynaý daǵdarys kezeńinde epidemiiaǵa qarsy kúresý úshin bizge barynsha halyqaralyq yntymaqtastyq kerek. Bizge Dúniejúzilik densaýlyq saqtaý uiymy sekildi qarjylandyrylǵan jáne jan-jaqty qyzmet kórsete alatyn uiymdar qajet. Eń álsiz elderge kómek berilip, EO sekildi uiymdarda pikirlestik bolýy tiis. Frantsiia ekonomikany jandandyratyn tiimdi sharalardy qolǵa alýǵa shaqyryp otyr. Eýropa men Aziia osyndaida niettestik bildirýi kerek. Frantsiia men Qazaqstandy biriktirip turǵan strategiialyq yntymaqtastyq bizdiń jumysymyzdyń basymdyqqa ie baǵyttarynyń biri bolyp qala beredi. Osynaý baǵyt-baǵdar qajettigin joǵaltpaý úshin bizge myqty ulttyq institýttar qajet. Qazaqstan men Frantsiianyń prezidenttik institýttary uqsas. Ol týraly bári jaqsy biledi», - dedi ol.
.jpeg)