Frantsiiada ustalǵan Resei Federatsiia keńesiniń Daǵystannan sailanǵan múshesi Sýleiman Kerimovke "salyq tóleýden jaltaryp, jasyryp qalǵan qarjysynyń izin japty" degen aiyp taǵyldy. Bul týraly Frantsiianyń Nitstsa qalasynyń prokýrory Jan-Mishel Pretr habarlady. Kerimov ózine taǵylǵan aiypty moiyndamaidy, dep jazady Azattyq.
22 qarasha kúni keshke sot Kerimovti bes million eýro kepil tólep bosatýǵa sheshim qabyldady. Tergeý aiaqtalǵanǵa deiin oǵan Teńiz jaǵasyndaǵy Alpi departamenti aýmaǵynan shyǵýǵa jáne frantsýz ádilet organdary tizimge alǵan adamdarmen sóilesýge tyiym salyndy. Budan ózge, ol Resei pasportyn tapsyryp, tergeý aiaqtalǵansha apta saiyn politsiiaǵa kórinip turýy tiis.
Kerimov 20 qarashada Nitstse áýejaiynda ondaǵan million eýrony jymqyrdy jáne salyq alaiaqtyǵyn jasady degen kúdikpen ustalǵan. Le Figaro basylymynyń jazýynsha, Kerimov Frantsiianyń ońtústik-shyǵys jaǵalaýlarynan jyljymaityn múlik, onyń ishinde reseilik oligarhtar arasynda tanymal Antib túbeginen villalar satyp alýda deldaldar men kompaniialar júiesin qurǵan. Le Figaro derekkózi salyq tólemin azaitý úshin satyp alynatyn jyljymaityn múlikterdiń baǵasy ádeii tómendetilgenin aitady. Biraq tergeý qujattarynda reseilik senatordyń aty atalmaǵan. Basylym Kerimovtiń isi boiynsha tórt adamnyń ustalǵanyn aitady. Olardyń aty-jónderi jariialanǵan joq.
Resei ishki ister ministrligi Frantsiia biliginiń áreketterin zańsyz sanaidy. Ministrlik Kerimovtiń resmi adam ekenin jáne diplomatiialyq qol suǵylmaýshylyq quqyǵy baryn aitady. Kreml Kerimovtiń "zańdy múddelerin" qorǵaý úshin barlyq sharany jasaýǵa ýáde berdi. Resmi Parij Kerimovtiń diplomatiialyq qol suǵylmaýshylyq quqyǵynyń áreket etý shegin frantsýz soty anyqtaitynyn málimdedi.
Sýleiman Kerimov Federatsiia keńesiniń 2008 jyldan beri depýtaty. 2016 jyly ol "Reseidegi eń bai 200 biznesmen" reitingisinde 1,6 milliard dollar bailyqpen 45-oryndy ielengen.
