Frantsiianyń memlekettik keńesi 9 jeltoqsanda burynǵy qazaqstandyq bankir, oppozitsiialyq oligarh Muhtar Ábliazovti ekstraditsiialaý týraly úkimniń kúshin joidy. Bul týraly Reuters habarlady. Al Ábliazovtiń Facebook paraqshasynda moderatordyń atynan jazylǵan "Jeńdik!" degen post jariialandy. Post avtory Frantsiia memlekettik keńesiniń frantsýz tilindegi sheshimine silteme jasaidy.
7 jeltoqsanda BUU-nyń azaptaý isterin tekserý jónindegi arnaiy ýákili Nils Meltser Frantsiia biligin qamaýda otyrǵan qazaqstandyq burynǵy oligarh Muhtar Ábliazovti Reseige ekstraditsiialamaýǵa shaqyrǵan. Meltser málimdemesinde: "Frantsiia qandai da bir adamdy azaptaýǵa ushyraý múmkindigi joǵary elge berip jibermeýi tiis" degen.
Buǵan deiin Frantsiia soty Muhtar Ábliazovti Reseige ekstraditsiialaý týraly sheshim shyǵaryp, Frantsiia premer-ministri Manýel Vals tiisti jarlyqqa 17 qyrkúiekte qol qoiǵan. Biraq Ábliazovtiń advokattary bul sheshimniń ústinen Frantsiia memlekettik keńesine shaǵymdanǵan.
Qazaqstandyq "BTA banktiń" burynǵy basshysy Muhtar Ábliazov 2013 jyldyń jazynan beri Frantsiianyń ońtústiginde Ýkraina men Reseidiń qarjylyq alaiaqtyq týraly aiyptaýy negizinde qamaýda otyr. Resei men Ýkraina Frantsiiadan ony qaitarýdy suraǵan. Qazaqstan biligi Ábliazovti "banktiń 6 milliard qarjysyn jymqyrdy" dep aiyptap, izdeý jariialaǵan. Ábliazov bul aiyptaýlardy joqqa shyǵaryp, óziniń qýǵynǵa ushyraǵanyn málimdep keledi. Qazaqstan azamattaryn ekstraditsiialaý týraly Astana men Parijdiń arasynda kelisim joq.
