Qazaqstannyń aviatsiia ákimshiligi FlyArystan áýe kompaniiasyna jospardan tys inspektsiialyq tekserý júrgizdi, dep habarlaidy QazAqparat.
QR IIDM Azamattyq aviatsiia komitetiniń málimeti boiynsha, tekserý júrgizýge 2022 jylǵy 19 naýryzdaǵy Nur-Sultan - Qostanai baǵyty boiynsha KS 7341 reisimen jolaýshylardy tasymaldaýdan bas tartý faktisine qatysty jolaýshylardyń ótinishi negiz bolǵan.
Tekserý nátijeleri boiynsha jolaýshylardy tasymaldaýdan bas tartýdyń sebebi evakýatsiialyq traptan aqaý tabylyp, áýe kemesiniń bortyndaǵy jolaýshylarǵa arnalǵan oryndar sany júzge deiin qysqartylǵan.
Oryndar sanyn qysqartý ushý qaýipsizdigi talaptary negizinde júzege asyrylǵan. Avariialyq trap durys jumys istemese, jolaýshylardy apatty jaǵdaida túsirý múmkin emes. Osy sebepti áýe kompaniia 180 orynnyń 70-in jabýǵa májbúr bolǵan.
Qazaqstan Respýblikasy Investitsiialar jáne damý ministriniń 2015 jylǵy 30 sáýirdegi №540 buiryǵymen bekitilgen Jolaýshylardy, bagajdy jáne júkterdi áýe kóligimen tasymaldaý qaǵidalaryna sáikes, jolaýshylardy áýe kemesiniń ushý qaýipsizdigine qater tóndiretin sebepter boiynsha tasymaldaýdan bas tartylsa, paidalanylmaǵan bilet quny nemese onyń bir bóligi qaitarylady.
