Fly Arystan áýe kompaniiasy 19 naýryz kúni birneshe reistiń shegerilýine bailanysty jeli qoldanýshylarynyń shaǵymyna túsinikteme berdi, dep habarlaidy QazAqparat.
Jeli qoldanýshylary 19 naýryzda Fly Arystan áýe kompaniiasy qyzmet kórsetýge tiis bolǵan Nur-Sultan – Qostanai reisinen sebepsiz túsirilgenin aityp shaǵymdanǵan bolatyn.
Áýe kompaniiasy atalmysh shaǵym boiynsha pikir bildirdi.
QazAqparat joldaǵan saýalǵa bergen jaýabynda kompaniia ókilderi 19 naýryz kúni Nur-Sultan - Qostanai baǵytyndaǵy KS 7341 reisi oryn sany shekteýli bortpen ushqanyn habarlady.
«Tehnikalyq sebep boiynsha jáne basshylyqqa alynýǵa tiisti qujattarǵa sáikes, atalǵan áýe kemesinde jolaýshylar sany boiynsha 110 oryndyq ýaqytsha shekteý qoiyldy. Mundai sheshim qabyldanǵannan keiin kompaniia osy reiske bilet alǵan jolaýshylardyń bárine qońyraý shalyp, basqa kúnderdi usyndy. 19 naýryzda usha almaǵan jolaýshylarǵa basqa kúnderge qaita brondaý usynyldy. Sondai-aq qonaq úiden oryn, tamaq jáne transfer usynyldy. Qaita brondaýǵa kelispegen jolaýshylarǵa áýe biletiniń úsh ese qunyna teń vaýcher jazyldy», - delingen kompaniia jaýabynda.
Áýe komapniia ókilderi atalǵan olqylyq úshin jolaýshylardan keshirim suraǵanyn aityp otyr.
«Ushý qaýipsizdigi bizdiń basty basymdyq bolǵandyqtan, osyndai sheshim qabyldandy», - deidi FlyArystan- mamandary.
Sondai-aq, áýe kompaniiasy Almaty-Oral baǵytyndaǵy reispen bolǵan jaǵdaiǵa túsinikteme berdi.
Ushaq 26 naýryzda ushyp shyqqanymen, aýa raiynyń qolaisyzdyǵyna bailanysty Atyraýǵa qonǵan bolatyn.
«26 naýryzda Almaty-Oral baǵytynda ushyp shyqqan KSH 7165 reisi Oral qalasyndaǵy qolaisyz meteojaǵdailarǵa bailanysty Atyraý qalasyna qonǵanyn habarlaimyz. Reis solkúngi saǵat 14.30-ǵa qaldyryldy. Keiin reis ýaqyty saǵat 21.00-ge deiin uzartyldy.Biraq aqyry toqtatyldy. Jolaýshylarǵa sýsyn men tamaq, jatar oryn usynyldy. Sonymen qatar, jolaýshylarǵa bilet qunyn satyp alǵan orynǵa qaitaryp alýǵa bolatyny aitylǵan» - delingen jaýapta.
