Fitch Ratings halyqaralyq reitingtik agenttigi Qazaqstannyń táýelsiz kredittik reitingin «BBB» deńgeiinde rastady. Reiting boiynsha boljam «Turaqty» bolyp qaldy, dep habarlaidy ult.kz.
Agenttik sarapshylarynyń baǵalaýynsha, Qazaqstannyń reitingin eldiń berik syrtqy qarjylyq ustanymy, taza sheteldik aktivterdiń joǵary kólemi jáne memlekettik boryshtyń tómen deńgeii qoldap otyr.
Fitch málimetinshe, 2026 jyly munai baǵasynyń joǵary bolýy Qazaqstannyń syrtqy ekonomikalyq jaǵdaiyn odan ári nyǵaitýǵa yqpal etedi. Ulttyq qordyń valiýtalyq aktivteri biyl mamyr aiynyń sońynda 66,4 milliard AQSh dollaryna jetken.
Sonymen qatar agenttik Qazaqstannyń taza sheteldik aktivter boiynsha kórsetkishi reiting deńgeii uqsas memleketter arasynda eń joǵary kórsetkishterdiń biri bolyp qala beretinin atap ótti.
Eldiń qarjylyq turaqtylyǵyn halyqaralyq rezervterdiń kólemi de kúsheitip otyr. 2026 jylǵy mamyrdaǵy jaǵdai boiynsha Qazaqstannyń halyqaralyq rezervteri 67,6 milliard AQSh dollaryna jetken. Sarapshylardyń pikirinshe, álemdik naryqtaǵy altyn baǵasynyń joǵary bolýy rezervterdiń ósýine oń áser etken.
Fitch boljamyna sáikes, Qazaqstannyń úkimettik boryshy 2026–2027 jyldary jalpy ishki ónimniń shamamen 23 paiyzy deńgeiinde saqtalady.
Agenttik sondai-aq Qazaqstan ekonomikasynyń ósimine oń baǵa berdi. Sarapshylardyń dereginshe, 2025 jyly el ekonomikasy 6,5 paiyzǵa ósken. Bul ósim kólik salasynyń qarqyndy damýy jáne ekonomikanyń basqa sektorlaryndaǵy belsendilikpen qatar júrgen.
Fitch aldaǵy jyldary kólik, óńdeý ónerkásibi jáne qyzmet kórsetý salalary Qazaqstan ekonomikasynyń negizgi ósý draiverleriniń biri bolyp qala beredi dep boljap otyr.
