Túrkistan oblysynyń Firdoýsi aýylynda oramal taqqany úshin mektepke kirgizilmegen oqýshylar oramaldaryn sheshe bastady. Bul týraly osy aýylda issaparmen júrgen Azattyq tilshisi habarlady.
Búgin tańerteń eldi-mekendegi Firdoýsi atyndaǵy mektepke oramalmen kelgen joǵary synyptyń ondaǵan oqýshy qyzyn mektep basshylyǵy sabaqqa kirgizbei qoiǵan. Oqýshylarmen 20 shaqty ata-ana da jinalyp, qyzdaryn mektepke kirgizýdi talap etken. Mektepti kúzetip turǵan politsiia qyzmetkerleri jinalǵandardyń taraýyn talap etýimen ata-analar birer saǵattan soń tarqady. Keshe kúndiz de jiyrma shaqty áiel mektep aldyna jinalyp, qyzdarynyń oramalsyz kirýine narazylyq tanytqan. Olardyń segizine keshe keshke aýdan ortalyǵy Myrzakent kentindegi politsiia bólimine jaýap berýge shaqyrtý qaǵazyn tapsyrǵan.
Búgin sonymen qatar oramal tartqany úshin mektepke kirgizilmegen úsh muǵalim ózderin jumystan bosatý týraly aryz jazdy. Bul týraly muǵalimderdiń ózderi (aty-jónin aitqysy kelmedi) habarlady jáne muny Firdoýsi atyndaǵy mektep direktory Janar Mamyrova da rastady. Biraq ol muǵalimder aryzyna qatysty ázirge sheshim qabyldamaǵanyn aitady. Muǵalimder buǵan deiin oramalmen jumysqa kelip júrgenderin, jumysta eshqandai kedergi bolmaǵanyn aitady.
Mektep direktorynyń aitýynsha, mektepte barlyǵy 372 oqýshy qyz bar. Olardyń 203-i joǵary synyptarda, 169-y bastaýysh synyptarda oqidy. Qazirge deiin bastaýysh synyptaǵy oramal tartatyn qyzdardyń túgelge jýyǵy, joǵary synyptaǵy 200-ge tarta qyzdyń 80-ge jýyǵy oramalyn sheshken.
Bilim jáne ǵylym ministrliginiń 2016 jyly qańtarda shyǵarǵan biryńǵai mektep formasy erejesi týraly №26 buiryǵy byltyr kúzde Aqtóbe, Batys Qazaqstan, Mańǵystaý jáne Ońtústik Qazaqstan oblystaryndaǵy keibir mektep ákimshiligi men ata-ana arasyndaǵy "oramal daýyna" sebepshi bolǵan. Atalǵan aimaqtarda mektep ákimshiligi sabaqqa kirgizbei qoiǵan ondaǵan oqýshynyń ata-anasy sotqa aryz bergen. Turǵyndar shaǵymyn qaraǵan sottar Bilim jáne ǵylym ministrligi men mekteptiń ustanymyn qoldaǵan.
