Finliandiianyń NATO-ǵa múshelikke ótý týraly resmi sheshimi jaqyn arada respýblikanyń joǵary zań shyǵarýshy organynda talqylanatyn bolady, dep habarlaidy Ulysmedia.kz.
Buǵan deiin Saýli Niiniste men Resei basshysy Vladimir Pýtin telefon arqyly áńgimelesý barysynda Helsinkidiń NATO-ǵa kirý jospary men Ýkrainadaǵy jaǵdaidy talqylaǵan bolatyn.
Eki eldiń kóshbasshylary Finliandiianyń NATO-ǵa múshelikke ótý úshin ótinish bergisi keletindigine bailanysty pikir almasty.
Áńgimelesý barysynda Niiniste Reseidiń sońǵy ailardaǵy áreketteri Finliandiianyń qaýipsizdigine alańdaýshylyq týdyrǵanyn, osyǵan bailanysty aliansqa kirý protsedýrasyn bastaý týraly sheshim qabyldanǵanyn túsindirdi. Sonymen birge, Finliandiia prezidenti óz eliniń Reseimen tatý kórshilik qarym-qatynasyn durys jáne kásibi túrde qurýdy jalǵastyratynyn atap ótti.
Kremldiń baspasóz qyzmetiniń habarlaýynsha, Pýtin suhbat barysynda dástúrli áskeri beitarap saiasattan bas tartý qate bolatynyn, óitkeni Finliandiiaǵa eshqandai qaýip tónip turmaǵanyn aitqan. Ol Niinistaǵa NATO-ǵa kirý ekijaqty qarym-qatynasqa keri áser etýi múmkin ekenin eskertti.
Reseidiń Ýkrainaǵa basyp kirýinen keiin Finliandiia turǵyndary arasynda NATO-ǵa kirý ideiasyn qoldaityndardyń sany ósti. Finliandiia men Reseidiń jalpy qurlyq shekarasy - shamamen 1200 km. Aldaǵy kúnderi Shvetsiia Finliandiiamen birge NATO-ǵa múshelikke ótinish beredi dep josparlanyp otyr.
