Áleýmettik jelilerde pandemiia – bul jahandyq qastandyq, al maska taqqan adamdar kómirtekpen dem alýǵa májbúr degen aqparat tarady. Munyń bári konspirologiialyq jáne ǵylymǵa qarsy teoriia, dep jazady Stopfake.kz saity.
Pandemiiany belgili bir álemdik úkimet josparlamaǵany týraly da burynyraq jazǵan bolatynbyz.
Konspirologiiany jaqtaýshylar pandemiianyń josparlanǵanyna dálel retinde belgisiz koronavirýstyń gipotetikalyq órshýine arnalǵan «Oqiǵa-201» oqý-jattyǵýlaryn keltirýde. Shara 2019 jyly pandemiia bastalǵanǵa deiin ótti. Paidalanýshylar uqsastyqtardy birden baiqady. Shyn máninde, «Oqiǵa-201» sharasy men COVID-19 pandemiiasyna ortaq nárse – bul eki jaǵdaida da koronavirýs qozdyrǵysh bolyp tabylady. Qalǵan bóliginde stsenarii COVID-19 pandemiiasynan aitarlyqtai erekshelenedi. Oqý-jattyǵýlar stsenariiine sáikes, virýs Braziliiada anyqtalady, ol áldeqaida juqpaly, odan bolatyn ólim-jitim áldeqaida kóp jáne vaktsina halyqtyń 90% aýrý juqtyrǵan kezde ǵana ázirlendi.
Mundai oqý-jattyǵýlar stsenariii mindetti túrde oryndalýy tiis emes. Onyń ústine mundai sharalar jii uiymdastyrylady. Eń tanymaldary – «Qarańǵy qys» (2001), transatlantikalyq bioterroristik shabýyl modeldelgen «Atlantikalyq daýyl» (2005) jáne «Kleid–IKS» – vaktsinasy ázirlenbegen jańa virýsqa arnalǵan stsenarii (2018).
Maska taqqan adamdar tolyqtai kómirtekpen tynys alýǵa májbúr degen tujyrym ǵylymǵa qarsy. Birinshiden, adamdar ottegin jutyp, kómirqyshqyl gazyn shyǵarady, bul taza kómirtegi emes, onyń dioksidi bolyp tabylady.
Kómirqyshqyl gazynyń molekýlalary mólsherine bailanysty maskalarda turyp qalmaidy. Kómirqyshqyl gazynyń bir molekýlasynyń mólsheri 0.33 nanometr. Al jai meditsinalyq maskanyń talshyqtary arasyndaǵy tesikter 0.3-ten 10 mikronǵa deiin. Bul rette, maskalar mólsheri 5-ten 15 mikronǵa deiin bolatyn silekei men qaqyryq bólshekterimen birge taralatyn virýsty ustap qalady.
Buǵan deiin biz maska taǵy ottegi jetispeýshiligine ákeledi degen feikti joqqa shyǵarǵan bolatynbyz.
Demek, taratylǵan aqparat durys emes. Pandemiia aldyn ala josparlanbaǵan jáne maska taǵý kómirtekpen ýlanýǵa ákelmeidi.
