Túrkistanda «Infodemiianyń ekinshi tolqyny: aldyn alý jáne jańa aqparattyq strategiia» atty onlain konferentsiiasy bolyp ótti, dep habarlaidy "Ult aqparat".
Onlain jiynǵa Qazaqstan Jýrnalister odaǵynyń tóraǵasy Seiitqazy Mataev pen Shymkent qalasy ákiminiń birinshi orynbasary Shyńǵys Muqan, QR Parlamenti Senatynyń depýtaty Aigúl Qapbarova men basqa da elge tanymal jýrnalister, blogerler men dárigerler qatysty. Jiynnyń ereksheligi – bir platformada elimizdegi úsh kásibi jýrnalister uiymynyń ókilderi bas qosty. Qazaqstan Jýrnalister odaǵy Seiitqazy Mataev, «Qazaqstan Media aliansynyń» basqarma tóraǵasy, senator Nurtóre Júsip jáne «BAQ KASIPODAQ» salalyq kásipodaǵynyń tóraǵasy Zeiin Álipbek qatysqan jiynda otandyq jýrnalistikaǵa ortaq máseleler qarastyryldy.
«Koronavirýstyń ekinshi tolqynynyń bastalýy infodemiianyń, iaǵni jalǵan, el arasynda úrei týdyratyn aqparattar epidemiiasynyń bastalatynyn bildiredi. Infodemiianyń basty qaýpi jurtshylyq jalǵan men shynaiy aqparattardy ajyrata almai qalady. Mundai jaǵdaiǵa túsken adam dárigerlerdiń keńesterine qulaq asýdy qoiady. Al bul bárinen de qaýipti», – dedi onlain konferentsiianyń moderatory, Qazaqstan Jýrnalister odaǵy Túrkistan oblystyq filialynyń tóraǵasy Ǵalymjan Elshibai.
Jiynda sondai-aq, infodemiianyń kesirinen búkil álemde kóptegen adam kóz jumǵany sóz boldy. Óitkeni, túrli aqparat quraldary arqyly koronavirýsty emdeýdiń tekserilmegen ádis-tásilderi taralyp, sonyń saldarynan naýqastar dárigerlerge tym kesh júgingen.
Bul rette Shymkent qalasy ákiminiń birinshi orynbasary Shyńǵys Muqan virýsqa qaraǵanda, jalǵan aqparattyń qateri kóbirek ekenine toqtalyp ótti. Ol feik jańalyqtarǵa qarsy immýnitet qalyptastyrý qajettigine toqtaldy.
«Tanymal adamdar estigenin aitady. Olardyń tanymaldylyǵy kópshiliktiń kókeiine senim uialatady da, solardyń aitýymen áldebir nárseniń shipasyna senip, densaýlyǵyna ziian keltirip jatqan jaǵdailar bar. Sondyqtan aqparatty tekserýdiń birinshi erejesi aqparat berýshiniń kompetentsiiasyna mán berý qajet. Emdelýdiń jolyn meditsinadan habary joq nemese áldebir adamnyń aitqany durys pa, dárigerdiń aitqany durys pa? Osylarda aiyrmashylyq úlken. Feik aqparat koronavirýstan da ziian bolýy múmkin. Aqparatqa immýniteti joq adam densaýlyǵyna odan beter ziian keltiredi»,- dep atap ótti Sh.Muqan.
Konferentsiia barysynda árbir kásibi jýrnalistiń óz isine jaýapkershilikpen qarap, aqparattyq gigienany saqtaý qajettiligi aityldy. Jiynda pandemiia kezinde jýrnalister dárigerlerden kem jumys istemese de, aqparat salasy qyzmetkerlerine jaǵdaidyń jasalmaǵanyna nazar aýdaryldy.
Belgili jýrnalist, Senat depýtaty Aigúl Qapbarova keibir memlekettik organ basshylarynyń pandemiiany syltaýratyp tilshilerge aqparat berýden bas tartý faktileriniń kezdeskenine, mundai qiyn-qystaý kezde BAQ ókilderiniń quqyqtaryn bulai shekteýge bolmaityna toqtalyp ótti.
Sondai-aq, senator otandyq BAQ-ty damytýdyń 2021-2023 jylǵa arnalǵan ulttyq jospary jasalyp, Úkimet qaýlysymen bekitilgenin aityp, atalǵan jospardyń baǵyt-baǵdaryn tanystyryp ótti.
Jiyndy qorytyndylaǵan Qazaqstan Jýrnalister odaǵynyń tóraǵasy Seiitqazy Mataev onlain konferentsiiada qozǵalǵan máseleniń ózektiligin atap ótip, paidaly jiyndardy aldaǵy ýaqytta da uiymdastyryp otyrýdyń mańyzdylyǵyna toqtaldy.
