Fermerlerdiń blokposttardan kedergisiz ótý máselesi qaraldy. Bul rette QR Aýyl sharýashylyǵy birinshi vitse-ministri Aidarbek Saparov IIM, Densaýlyq saqtaý ministrligi jáne oblys ákimderiniń orynbasarlarymen selektorlyq keńes ótkizdi, dep habarlaidy QazAqparat.
Birinshi vitse-ministrdiń aitýynsha, QR Premer-Ministriniń blokposttarda fermerlerdiń júrip-turýyn jedel sheshý týraly bergen tapsyrmasyna qaramastan, kóptegen sharýashylyq ieleri ministrlikke ruqsat alý tártibi boiynsha habarlasýda.
«Bul másele birneshe ret qaraldy, QR Prezidenti, Premer-Ministr kóktemgi egis jumystaryn júrgizýge barlyq jaǵdai jasaýda, onyń ishinde fermerler men servistik uiymdardyń kedergisiz qozǵalysyn qamtamasyz etýdi tapsyrdy. Bul másele Memlekettik komissiianyń kún tártibinde. Eń bastysy - Prezidenttiń tapsyrmasy bar. Fermerlerge kedergi jasaýdyń qajeti joq. Kim elektrondy túrde jumys istegisi kelse, solai jasasyn. Birinshiden, fermerlerdiń ótinishteri jedel qaralýy kerek, iaǵni 2-3 kúnge sozbai. Sonymen qatar, ruqsatty qalai alý kerektigin naqty túsindirip, fermerlerge tiisti jaǵdai jasaý qajet. Eger elektrondy ruqsat bolmasa, aýylsharýashylyq taýar óndirýshileriniń qaǵaz anyqtamalary negizinde jasalsyn», - dedi Aidarbek Saparov.
QR IIM Ákimshilik politsiia komitetiniń tóraǵasy Murat Baimuqashev fermerlerdi ótkizý pýnktterinen ótý tártibi týraly habarlady. Baqylaý-ótkizý pýnktterinde barlyq aqparat planshet bazasyna júktelgen. Tipti fermerdiń júk kóligi týraly aqparat bazaǵa enbegen jaǵdaida, aýylsharýashylyq ónimin óndirýshi degen qujaty bolsa jetkilikti ekenin aitty.
«Árbir qyzmetkerge kóktemgi dala jumystaryn júrgizýdiń mańyzdylyǵy men kóktemgi egis jumystaryna kedergi keltirgen jaǵdaida qandai saldary bolatyny aityldy. Bul másele erekshe baqylaýǵa alyndy. Eger sharalarǵa qatysty aqparat politseidiń planshetinde joq bolsa, biraq fermerdiń qolynda anyqtamasy bolsa, bul jetkilikti, eshqandai suraqtardyń qajeti joq», - dep atap ótti M.Baimuqashev.
Sondai-aq, IIM-niń ókili oblys ákimdikterine saiajai turǵyndarynan shekteýlerdi alyp tastaý múmkindigin qarastyrýdy usyndy.
«Saiajailar boiynsha suraqtar kóp kelip túsýde. Osy sanattaǵy adamdardy anyqtap, qabyldanǵan sharalardy politsiiaǵa jetkizýge bolady. Eger múmkindik bolsa, saiajailar boiynsha shekteý, tym bolmasa ýaqytsha bolsyn alyp tastalsa. Buǵan nazar aýdarýlaryńyzdy suraimyn», - dedi ol oblys ákimderiniń orynbasarlaryna qarata aitqan sózinde.
Keńes qorytyndysy boiynsha Aýyl sharýashylyǵy birinshi vitse-ministri Memlekettik organdardyń ókilderine fermerlerdiń júrip-turýyna kedergiler keltirmeý jóninde ótinish bildirdi.
«Kóktemgi egis naýqanyna maýsymdyq jumysshylar kóp tartylady. Olardyń barlyǵyn bazaǵa engizgenshe, ýaqyt ketedi. Qazir eń bastysy – ár kúndi tiimdi paidalanyp, egisti egý. Búkil respýblika kóleminde egis jumystary qarqyndy júrgizilýde. Elimiz úshin eń mańyzdy naýqanǵa kedergi keltirmeńizder, týyndaǵan barlyq máselelerdi jedel sheshýdi suraimyn», - dep túiindedi Aidarbek Saparov.
Esterińizge salsaq, koronavirýs pandemiiasy kezeńinde aýyl sharýashylyǵy ónimderin óndirýshilerdiń júrip-turýy boiynsha biryńǵai algoritm ázirlendi. Ol 2020 jylǵy 17 sáýirdegi Memlekettik komissiia otyrysynda maquldandy. Bas sanitarlyq dárigerdiń qaýlysymen aýyl sharýashylyǵy jumystaryn júrgizý kezinde fermerler men kóktemgi egis naýqanyna qatysty basqa da adamdardyń jáne olardyń jeke kólikterine kedergisiz júrip-turý quqyǵy berilgen bolatyn.
