Parlament Májilisiniń jalpy otyrysynda depýtat Berik Bekjanov agroónerkásip kesheniniń jekelegen sektorlaryn qoldaýǵa baǵyttalǵan investitsiialyq sýbsidiialarǵa qatysty depýtattyq saýalyn jariialady, dep habarlaidy "Ult aqparat".
«Sýbsidiia alýǵa ótinim berý rásimi «Aqparattyq - esepteý ortalyǵy» Aktsionerlik Qoǵamynyń Qoldau.kz platformasy negizinde júzege asyrylady. Búgingi tańda platformada 218 myń 977 paidalanýshy tirkelgen. Qoldau.kz sandyq platformasy aqyly negizde jumys isteidi jáne qyzmet quny alynǵan sýbsidiia somasyna bailanysty. Máselen, sýbsidiia somasy 100 myń teńgege deiin bolsa, tólem 3 ailyq eseptik kórsetkishti quraidy. Bul shamamen 9 myń teńge, 1 mln teńgege deiin – 10 AEK - ti, iaǵni 29 myń teńge, al 1 mln teńgeden astam - 11 ailyq eseptik kórsetkish, 32 myń teńge shamasynda tólenýi tiis. Onsyz sharýa sýbsidiiadan qaǵylady. Bizge jáne sharýalarǵa qyzmettiń quny nege sýbsidiia kólemine bailanysty ekeni túsiniksiz, óitkeni munda tek ótinim berý rásimdeledi, onyń ózi avtomatty túrde jasalady. Biyl osy qyzmetti alýshylardyń sany 218 myńnan astam ekendigin eskersek, sandyq platformanyń qansha tabys tabatynyn esepteý qiyn emes», - dedi B. Bekjanov Premer-Ministrdiń orynbasary Roman Skliardyń atyna joldaǵan saýalynda.
Onyń aitýynsha, sharýalardyń kóptegen shaǵymdary platforma arqyly ótinish berý kezindegi kedergilerge bailanysty. Dihandar dala jumysyn atqarýdyń ornyna tań atqannan kún batqanǵa deiin kompiýterge úńilip, portalǵa ótinish berý úshin «múmkindikter terezesin» izdeýge májbúr! Biraq «múmkindik terezesiniń» qyzmeti portaldyń ashylý ýaqytyn biletinderge ǵana buiyrady eken. Bul rette agrarshylardyń biýdjette qarajattyń bolýyna qaramastan aldyn ala ótinimderdi ornalastyrýǵa eshqandai múmkindigi joq.
«Sondyqtan da halyq arasynda bul júieni «Qoldau» emes, «Qorlau» degen uǵym qalyptasqan. Budan basqa, mal basyn esepke alý Aýyl sharýashylyǵy ministrligi «Aqparattyq-taldaý júiesi» (ATJ) arqyly júzege asyrylady, onda tirkeý úshin sharýa 8500 teńge jáne jańa týǵan nemese satyp alynǵan mal basynyń ár basyna 200 teńge tóleidi. Biraq sýbsidiia alý úshin taǵy bir aqparattyq júiege – «sýbsidiialaýdyń aqparattyq júiesine» (SAJ) ótinim berý arqyly tirkelý qajet. Osylaisha, sharýa maldyń sapasyn jaqsartý men ónimdilikti arttyrýdyń ornyna, aýyldaǵy internettiń sapasynyń tómendigine qaramastan «tarydai shashylǵan» elektrondy portaldardyń qýlyqtaryn túsinýge jáne onymen aqyly negizde jumys jasaýǵa májbúr», - dedi Bekjanov.
Joǵaryda baiandalǵannyń negizinde tiisti usynystar jasaldy:
1) Sandyq platformalar Qoldau.kz, «Aqparattyq-taldaý júiesin» jáne «Sýbsidiialaýdyń aqparattyq júiesin» bir arnaǵa toǵystyryp, «bir tereze» qaǵidaty boiynsha jumysyn retteý.
2) Sybailas jemqorlyq kórinisterin joiý maqsatynda memlekettik kórsetiletin qyzmet standartyna sáikes, Tsifrlyq platformanyń jumysyn aqysyz, aldyn ala ótinim berý múmkindigin qarastyra otyryp, tolyq avtomattandyrý.
