KSRO xalyq artisi Farida Sháripovanyń turǵan úiine ónerdegi saxnalas áriptesteri eskertkish taqta ornatyp, eske aldy.
KSRO halyq artisi, Memlekettik syilyqtardyń laýreaty, professor Farida Sháripovaǵa 1971-2010 jyldary aralyǵynda ómir súrgen Almaty qalasynyń Dostyq Qabanbai batyr kósheleriniń qiylysynda ornalasqan kópqabatty úidiń qabyrǵasyna ornatylǵan eskertkish taqtanyń ashylý saltanaty ótti.
Bul eskertkish taqta Muhtar Áýezov atyndaǵy Qazaqtyń memlekettik akademiialyq drama teatrynyń ujymymen Almaty qalalyq ákimdiginiń muryndyq bolýymen ashyldy. Endi bul kóshemen júrgen qala turǵyndary taqtaishaǵa qarap Farida Sháripovany eske alatyn bolady. Eskertkish taqtany Farida Sháripovanyń áriptesteri, sahnalas, ómirlik dostary Qazaqstannyń Eńbek Eri, KSRO halyq artisi, teatrymyzdyń kórkemdik jetekshisi Asanáli Áshimovpen Qazaqstannyń halyq artisi, Memlekettik syilyqtarynyń laýreaty, teatrymyzdyń artisi Sábit Orazbaev ashty.
- Endi, búgin Faridaǵa eskertkish taqta ashyp jatyrmyz. Osy jerde myna turǵan úide ekeýmiz kórshi turdyq. Faridamen stýdent kezimizden bastap qoiylymdarda partner boldyq. Ol bul ómirden ótkenshe dostyǵymyz jalǵasqan. Teatr sahnasynda kóptegen spektaklderde birge oinadyq. Farida tárbiesimen, tártibimenen jastarǵa úlgi – ónege bolǵan talantty aktrisa. Endi ómir zańy osylai ǵoi! Bul ómirde máńgilik eshteńe joq. Faridany erte ketti dep esepteimiz. Áli biraz rólder somdaityn múmkinshilikteri boldy. Biraq taǵdyry solai boldy. Memlekettik syilyǵynyń laýreaty, Keńes odaǵynyń halyq ártisine endi qala ákimshiligi Almaty kósheleriniń birine Faridanyń esimin berý kerek dep oilaimyn. Topyraǵy jaily bolsyn!- deidi KSRO halyq artisi, teatrymyzdyń kórkemdik jetekshisi Asanáli Áshimov.
Farida Sháripova 1959 jyly Qurmanǵazy atyndaǵy Almaty memlekettik konservatoriiasyn bitirip, M.Áýezov atyndaǵy Qazaq akademiialyq drama teatryna qabyldanǵan. Jarty ǵasyrdan astam ýaqyt boiy osy teatrda úzdiksiz óner kórsetken. Sahnada qazaq jáne álem klassikteriniń dramalyq týyndylarynda, osy zamanǵy qoiylymdarda basty rólderdi sheberlikpen oryndap, ulttyq teatr óneriniń jańa sapalyq biikke kóterilýine úlken úles qosqan. M.Áýezovtiń “Aiman-Sholpanynda” Sholpan, “Abaiynda” Ajar, “Qara qypshaq Qobylandysynda” Qarlyǵa, “Eńlik-Kebeginde” Eńlik, “Karagózinde” Qaragóz, Ǵ.Músirepovtiń “Qozy Kórpesh-Baian sulýynda” Baian, Á.Nurpeiisovtiń “Qan men terinde” Aqbala, T.Ahtanovtyń “Boranynda” Jańyl, Sh.Aitmatovtyń “Jámilasynda” Jámila, “Ana – Jer-anasynda” Tolǵanai, Q.Muhamedjanov pen Sh.Aitmatovtyń “Kóktóbedegi kezdesýinde” Gúljan men Aisha, Q.Muhamedjanovtyń “Biz perishte emespizinde” Asyl, O.Bókeevtiń “Qulynym menińinde” Anar, D.Isabekovtiń “Ápkesinde” Qamajai, S.Balǵabaevtyń “Ǵashyqsyz ǵasyrynda” Farida, Sofokldyń “Edip patshasynda” Iokasta, Evripidtiń “Medeiasynda” Medeia, Shekspirdiń “Asaýǵa tusaýynda” Katarina, “Richard III” tragediiasynda Anna ledi, Pýshkinniń “Shaǵyn tragediialarynda” donna Anna, Chehovtyń “Súiikti meniń aǵataiymynda” Elena Andreevnanyń qaitalanbas obrazdaryn somdaǵan.
- Bul kisini qazirgi jastar bilmeýi múmkin! Altyn daýys iesi edi ǵoi! Abdolla Qarsaqbaevtyń «Meniń atym Qoja» atty kinosyn barshamyz jaqsy bilemiz. Sonda balanyń daýysyn Farida apai oryndady. Mine, qarańyz sodan-aq onyń qandai talantty aktrisa bolǵanyn aitýǵa bolady. Farida apaimen sahnada birge óner kórsetý biz úshin úlken maqtanysh bolatyn. «Ǵashyqsyz ǵasyr» degen spektaklde ol kisi basty beinede oinady. Al men sol kisimen birge júrgen dosyn oinadym. Ol kisimen sahnalas bolý óte qiyn. Ol kisi qarap turǵanda, kózine qaraý múmkin emes! Ishki kúshi degen ǵajap bolatyn tuǵyn. Tipti qoiylymda onyń qasynda ishtei dirildep turatyn edim! Sol kisimen sahnada bir ról bolsada oinaǵan baqyt qoi! Búgin eske alyp jatqanymyzǵa óte qýanyp turmyn. Búgingi taqtany óte jaqsy oranalastyrdy. Teatr ujymyna jáne qalanyń ákimshiligine rahmet aitqym keledi. Óitkeni olar óner adamynyń el aldyndaǵy qandai eńbegi bar ekenin jaqsy biledi, - deidi Qazaqstannyń eńbek sińirgen artisi, «Qurmet» ordeniniń iegeri Ǵaziza Ábdinábieva.
Farida Sháripova kino salasynda da jemisti eńbek etti. Ol áigili rejisserler Sháken Aimanov, Májit Begalin, Sultan Qojyqov, Ázirbaijan Mámbetov, Leonid Agranovich túsirgen kóptegen tanymal filmderde oinady. Dýbliaj salasyna da kóp eńbek sińirdi.
Farida Sháripova ónerli jastardy tárbieleý isine jete kóńil bóldi. T.Júrgenov atyndaǵy óner akademiiasynda kórnekti akter Y.Noǵaibaev ekeýiniń shyǵarmashylyq sheberhanasynda shyńdalǵan jastar búginde elimizdiń teatrlarynda jemisti eńbek etip júr. Farida Sháripova mádeniet pen ónerdegi eńbegi úshin Qazaq KSR halyq ártisi, KSRO halyq ártisi qurmetti ataqtaryn, Qaz KSR Memlekettik syilyǵy men KSRO Memlekettik syilyǵyn, “Parasat” ordenin ielendi.
Bul eskertkish taqtanyń ashylý saltanaty juma kúnine sáikes kelýine orai, Farida Sháripavanyń turǵan páterinde urpaqtary dastarhan jaiyp, marqumnyń arýaǵyna quran baǵyshtady.
Asa daryndy aktrisa, kórnekti óner qairatkeri Farida Sháripovanyń jarqyn beinesi halyqtyń jadynda árdaiym saqtalady.
