Qyzylorda oblysynyń Qazaly aýdandyq soty efirde kórineý jalǵan aqparat taratqan aýdan turǵynyn 428 820 teńge kóleminde aiyppul tóleýge mindettedi, - dep habarlaidy Tengrinews.kz agenttigi Qazaly aýdandyq sotynyń baspasóz qyzmetine silteme jasap.
Sotta D. esimdi áiel Facebook jelisinde tikelei efirde T. esimdi er adamnyń 2019 jyly para alǵanyn, sybailas jemqorlyq qylmysyn jasaǵanyn habarlaǵany málim boldy.
"Osylaisha ol ádeii jalǵan aqparat taratqan. Er adam sotqa aryz jazdy", - dep habarlady aýdandyq sottyń baspasóz qyzmeti.
Onyń Qazaqstan Respýblikasy Ákimshilik quqyqbuzýshylyq týraly kodekstiń 73-3-baby 3-bóligi boiynsha "Kópshilik aldynda nemese buqaralyq aqparat quraldaryn nemese telekommýnikatsiialar jelilerin paidalana otyryp, basqa adamnyń abyroiy men qadir-qasietine nuqsan keltiretin nemese onyń bedelin túsiretin kórineý jalǵan málimetter taratý, adamdy sybailas jemqorlyq, aýyr nemese asa aýyr qylmys jasady dep aiyptaýmen ushtasqan jala jabý" D. esimdi áielge qatysty ákimshilik is qozǵaldy. 2022 jylǵy 30 qyrkúiekte is aýdandyq sotta qaraldy.
"Sot D. esimdi áieldi QR Ákimshilik quqyqbuzýshylyq týraly kodekstiń 73-3-baby 3-bóliginde kózdelgen ákimshilik quqyqbuzýshylyqty jasaǵany úshin kináli dep tanydy. Biraq jeńildetetin mán-jailar retinde áieldiń buryn ákimshilik jaýapkershilikke tartylmaǵanyn eskere otyryp, QR ÁQBtK-niń 829-11-baby 2-bóligi boiynsha 200 ailyq eseptik kórsetkish nemese 612 600 teńge aiyppul otyz paiyzǵa azaityldy, 428 820 teńge", - dep habarlady aýdandyq sottyń baspasóz qyzmeti.
Qaýly zańdy kúshine engen joq.
"Sot sheshimimen kelispegen tarap sheshim shyǵarylǵan kúnnen bastap on kún ishinde Qyzylorda oblystyq sotyna apelliatsiialyq shaǵym túsirýge quqyly", - dep habarlady aýdandyq sottyń baspasóz qyzmeti.
