Parijdiń basty kórkem oryndarynyń biri – Eifel munarasy Livan astanasy Beirýttaǵy joiqyn jarylys qurbandaryn eske alý úshin tún ortasynda jaryǵyn sóndirdi, dep habarlaidy News18.com.
Beisenbi kúni túnde Eifel munarasy Beirýttaǵy joiqyn jarylystyń 135 qurbanyn eske alý úshin bir saǵat jaryqsyz turdy. Munaranyń resmi saitynda mynadai habarlama jariialandy: «Beirýt turǵyndary men Livan azamattaryna tilektestikpen tún ortasynda jaryǵymdy sóndiremin».
Reuters málimetinshe, jarylys saldarynan júzden astap adam qaza tapqan. Solardyń arasynda frantsýz sáýletshisi Jan-Mark Bonfis te bolǵan. Al, jaraqat alǵan 4 myń adamnyń ishinde Frantsiianyń 24 azamaty bar. Frantsiia jarylys kezinde zardap shekkenderge birneshe júz myń eýro bólip, birneshe ushaqpen gýmanitarlyq kómek jiberedi. Budan bólek, Frantsiia prezidenti Emmaniýel Makron Beirýtqa barady dep josparlanyp otyr.
Eifel munarasynan bólek, Dýbaidaǵy Býrj-Halifa kóp qabatty úii de Livan týynyń túsine bólenip, qurbandardy eske aldy. Sondai-aq, Livan jalaýy Mysyrdaǵy Giza piramidalarynda da paida boldy.
Eske sala keteiik, 4 tamyzda Livannyń áskeri-teńiz kúshteri (ÁTK) bazasyna jaqyn Beirýt porty aýmaǵynda joiqyn jarylys boldy. Jarylys saldarynan Qazaqstannyń SIM Livandaǵy Qazaqstannyń diplomatiialyq missiiasy ǵimaratyna zaqym kelgen. Jarylys kezinde diplomatiialyq missiianyń qyzmetkerleri jumys kúni aiaqtalǵannan keiin keńseden ketip qalǵan. Konsýl jumysta bolǵandyqtan jarylys tolqyny kezinde jeńil jaraqat aldy. QR Prezidenti Qasym-Jomart Toqaev Livan Prezidenti Mishel Aýnmen telefon arqyly sóilesýi barysynda Livandaǵy qazaqstandyqtardyń qaýipsizdigin qamtamasyz etý jóninde ótinish bildirgen edi.
5 tamyz kúni jarylystyń neden shyqqany anyqtaldy. Bilik málimdemesine sáikes, ammonii nitratynyń úlken partiiasy (ammiak selitrasy dep te atalaidy) portta uzaq ýaqyt saqtalyp, qaýipsizdik talaptary saqtalmaǵan.
Sońǵy málimet boiynsha Beirýttaǵy jarylystan 137 adam qaza tapqan.
