foto: Tengrinews.kz
Evakýatsiialanǵan qazaqstandyqtar Nur-Sultanǵa ushyp kelgennen keiin Ýkrainadaǵy jaǵdai men joldaǵy qiyndyqtar, soǵys júrip jatqan jerde qalǵan dostary týraly aitty, - dep habarlaidy Tengrinews.kz tilshisi.
Shý qalasynyń turǵyny Asylan Qastaev Dnepropetrovskke jumys saparymen barǵan. Ol jerde bir ai bolǵan. Al Polsha shekarasyna deiin taksimen jetken.
"Taksi júrgizýshisi 450 dollarǵa apardy. Bul mańyzdy emes (bolyp jatqan jaǵdaimen salystyrǵanda. - eskert.). Benzin joq, 50-60 shaqyrymdai júrýge týra keledi. Kópir eki ret jaryldy, janarmai quiyp alǵannan keiin de ol jerlerde bomba jaryldy. Reseilik tikushaqtaryn kórdik, ushyp júrdi. Balalar úiine tústi, jolda avtobýs bombalanǵanyn kórdik. Adamdardy óltirip jatyr. Olar óte batyl. Bizdi alyp kelgen taksi júrgizýshisi de sondai. Qan tapsyrýǵa bardyq, biraq bere almadyq, óitkeni kóp adam qan tapsyryp jatyr", - dedi ol óz Otanyna kelgennen keiin áýejaida.
Elena Kýzmina Kievte 10 jyldan beri turady. "Eir Astana" oǵan ózimen birge tórt marǵaýy bar mysyqty bortqa alýǵa ruqsat bergen.
"Qorqynyshty boldy: belgisizdik, jarylystar. Úsh kún tamaq ishpedik, kúnine eki saǵat uiyqtadyq. Baqytymyzǵa orai, jumysym qashyqtan isteledi. Ómir jalǵasyp jatyr. Jaǵdai turaqtalǵannan keiin Kievke oralamyn. "Eir Astanaǵa" alǵys bildiremin. Marǵaýlar tynysh keldi", - dedi ol.
Kárim Májiqulov áielimen birge Ýkrainada 2013 jyldyń aiaǵynan bastap turady jáne jumys isteidi.
"Elde soǵys bolyp jatyr. 24 aqpanda tańerteń Lvov oblysynda issaparda boldym. Bizden 15 shaqyrym jerde tikushaq áskeri bólimi boldy. Sol jerden tańerteńgi jetiden bastap jarylystar estildi. Sodan keiin oǵan zymyran soqqysy tigenin bildik. Men biletin ýkrainalyqtar óz erkimen soǵysqa attandy. Olardan keide habar alyp otyramyn", - dedi Májiqulov.
Kievten shekaraǵa deiin Kárim balasymen jáne áielimen birge óz kólikterimen jetken. Shekarada ony dostaryna qaldyrǵan.
"Harkovta qalǵan qazaqstandyqtar bar. Dosym Daniiar qazir sol jerde, besinshi táýlik boiy búkil otbasymen birge bombadan jasyrynyp jatyr. Harkov Reseimen shekarada ornalasqan. Áielim de Harkovtaǵy áriptesterimen habarlasyp otyr. Kievten nemese Odessadan shyǵýǵa qaraǵanda ol jaqtan shyǵý qiynyraq", - dedi ol.
