Jýrnalist daiarlaý úderisine «avtorlyq bilim baǵdarlamalaryn» engizýimiz kerek. Bul týraly L. N. Gýmilev atyndaǵy Eýraziia ulttyq ýniversitetiniń rektory Erlan Sydyqov málim etti, dep habarlaidy QazAqparat.
«Qazir álem jýrnalistik bilimge jańa kózqarastyń qajettigin sezine bastady. Bul neden týyndaidy? Árine, aqparat tehnologiialarynyń damýy bir basqa, adamdardyń qabyldaý ereksheligi de múldem ózgerdi. Birińiz jahandaný, birińiz ǵalamdaný dep júrgen úderis ómirdiń bar salasyna jańalyqtar alyp kelip jatyr. Osy ózgeristiń basynda aqparat nemese jýrnalistika júreri sózsiz. Óz basym ýniversitet basshysy retinde ǵana emes, eldegi aqparat júiesine, ashyq BAQ alańdaryna shyǵyp júrgen azamat retinde búgingi jýrnalistika men aqparattyq bilimge beijai qarai almaimyn», - dedi E. Sydyqov onlain-formatta «Qazaqstan Respýblikasyndaǵy jýrnalistika deńgeii» taqyrybynda ótken talqylaý barysynda.
Osy oraida ol tiisti usynystaryn ortaǵa saldy.
«Birinshiden, qazir Qazaqstan ýniversitetteri avtonomiiaǵa qarai qadam basyp, ózindik bilim baǵdarlamalaryn jasaýǵa múmkindik aldy. Osyny paidalanyp, jýrnalist daiarlaý úderisine «avtorlyq bilim baǵdarlamalaryn» engizýimiz kerek. Taiaýda Bilim jáne ǵylym ministrligi ǵylymi dárejeden góri shyǵarmashylyq tájiribeni qajet etetin qoldanbaly mamandyqtar qatarynda jýrnalistikany atady. Biz osy ideiany qoldaimyz. Jýrnalistika fakýltetine aty-zaty bar, tájiribesi mol jýrnalister tartylýy kerek. Mysaly, «Saýytbek Abdrahmanovtyń synyby», «Nurtóre Júsiptiń synyby», «Janbolat Aýpbaevtyń synyby», «Jarylqap Beisenbaiulynyń synyby», «Bibigúl Jeksembai synyby» dese, buǵan búkil el, barsha jýrnalister qaýymy, ásirese talapkerler eleń ete qalar edi. Árine, teoriialyq bilim praktika qaptalynda júre beredi», - dedi rektor.
