Eýropalyq parlament depýtaty, EP Ortalyq Aziia elderimen yntymaqtastyq jónindegi delegatsiia jetekshisi Iveta Grigýle-Peters Siriiadan Qazaqstan azamattaryn evakýatsiialaý jónindegi operatsiiaǵa qatysty pikir bildirdi, dep habarlaidy «QazAqparat» tilshisi.
«Memlekettiń basty mindeti - óz azamattaryn qorǵaý. Sonda ǵana azamattar qai jerde júrmesin óziniń qorǵaýshysy bar ekenine senimdi bolady», - dedi I. Grigýle-Peters.
Onyń aitýynsha, Siriiadan 47 Qazaqstan azamatynyń evakýatsiialanýyn Eýropalyq parlament joǵary baǵalaǵan.
«Quqyq qorǵaý organdary Syrtqy ister ministrligimen birlesip júrgizgen gýmanitarlyq operatsiiany biz óte joǵary baǵalaimyz. Osyndai qiyn jaǵdaida ári kikiljiń ortalyǵynda kúrdeli operatsiiany sátti iske asyrý ońai emes», - dedi Eýroparlament depýtaty.
Onyń pikirinshe, qazaqstandyq azamattardy Siriiadaǵy kikiljiń aimaǵynan qaitarý boiynsha arnaiy júrgizilgen gýmanitarlyq operatsiia otandyq diplomattardyń daiyndyǵynyń joǵary deńgeide ekendigin kórsetedi.
«Men buǵan deiin Sizderdiń diplomattaryńyzben birge jumys istegenmen, Syrtqy ister ministrliginiń kadrlary - álemdik deńgeide deýge bolatyndai óte joǵary bilikti mamandar. Sońǵy operatsiia sony dáleldedi», - dedi I. Grigýle-Peters.
«Osy oqiǵaǵa qarai otyryp Qazaqstan árbir azamatyn qorǵaitynyn kóremin, árbir áiel, qariia nemese bala - bul memlekettiń baǵa jetpes bailyǵy. Solai bolýy da kerek», - dedi ol.
Onyń oiynsha, EO, RF, AQSh sekildi álemdegi birneshe memleket qana ainalysatyn óz azamattaryn maqsatty túrde eline qaitarý isi «basqalarǵa jaqsy úlgi bolmaq».
«Bul oqiǵa Qazaqstannyń kúrdeli jaǵdaida sheshim qabyldaýda jaqsy ári senimdi áriptes ekendigin kórsetedi», - dep túiindedi I. Grigýle-Peters.
