Eýropanyń kei elderiniń biligi COVID-19-ǵa qarsy vaktsinalardyń 1-shi jáne 2-shi komponentin engizý merzimin uzartyp jatyr, dep habarlandy QR Úkimeti janyndaǵy Qazaqstanda koronavirýstyń taralýyna jol bermeý jónindegi vedomstvoaralyq komissiianyń Telegram kanalynda.
Italiiada alǵashqy vaktsinalaý men revaktsinalaý arasyndaǵy úzilisti arttyrý týraly norma bekitildi. Endi dozalar arasyndaǵy merzim 21 jáne 28 emes, 42 kúndi quraidy. Bul Pfizer jáne Moderna vaktsinalaryna qatysty belgilengen.
El biliginiń aitýynsha, komponentterdi engizý arasyndaǵy ýaqytty eki ese uzartý birinshi kezeńde ekpemen biraz adamdy qamtýǵa múmkindik beredi. Apennin túbeginde vaktsinany jetkizý boiynsha máseleler áli de bar.
Italiiada aǵymdaǵy jyldyń qańtarynda birinshi kezekte dárigerler, qarttar men qarttar úiiniń qyzmetkerleri vaktsina qabyldai bastady. Jappai ekpe salý tegin jáne erikti túrde júrgizilýde, dese de el biligi otandastaryna vaktsinatsiia jasaýǵa keńes beredi. Sebebi egý naýqany josparlaǵannan baiaý júrýde. Negizgi sebepterdiń biri — vaktsinalardy jetkizýdegi irkilister.
2021 jyldyń sońyna deiin Italiia halqynyń 90% - yn egý josparlanǵan. Sáýir aiynyń ortasyndaǵy málimetterge sáikes, Italiiada «koronavirýs pnevmoniiasy» diagnozy rastalǵan 110 myńnan astam adam kóz jumdy.
El ǵalymdary men saiasatkerleriniń bastamasymen reseilik «Spýtnik V» vaktsinasyn satyp alý máselesi talqylanýda, sondai-aq ony Italiiada óndirý kózdelýde.
Ispaniia eli de AstraZeneca vaktsinasynyń dozalary arasyndaǵy aralyqty edáýir arttyrdy. 60 jasqa deiingi adamdar úshin tórt jáne 12 aptadan 16 aptaǵa deiin uzartty dep habarlaidy Reuters.
Ispaniia Eýroodaq memleketteri arasynda 2 komponentti engizý arasyndaǵy ýaqytty 12 aptadan asa ýaqytqa sozǵan birinshi el.
Densaýlyq saqtaý ministrligi ruqsattyń áreket etý merzimin uzartý vaktsinany qoldanýdyń eń qaýipsiz ádisin anyqtaýǵa múmkindik beretindigin málimdedi. Bastapqyda AstraZeneca preparaty 18-65 jas aralyǵyndaǵy jumysshylarǵa salyndy, jas adamdarda qan uiyp qalý qaýpiniń týyndaýyna bailanysty vaktsina tek 60 jastan asqan adamdarǵa salýǵa ruqsat etildi. Biliktiń mundai qadamy birinshi dozany alǵan kei jastardyń ekinshi dozany alý múmkindigin joǵaltýyna ákeldi.
Dozalar arasyndaǵy aralyqty ulǵaitý bilikke atalǵan toptardaǵy adamdar úshin AstraZeneca nemese ózge vaktsinanyń ekinshi komponentin qabyldaý ne qabyldamaý týraly sheshim shyǵarmas buryn ártúrli vaktsinalardy aralastyrý synaqtaryn baǵalaýǵa múmkindik beredi.
