Estoniia 19 qyrkúiekten bastap Shengen vizasy bar reseilik týristerdi elge kirgizbeitinin jariialady. Bul týraly 8 qyrkúiekte eldiń syrtqy ister ministri Ýrmas Reinsalý málimdedi, dep habarlaidy Azattyq.
Ministrdiń sózinshe, Estoniiadan, ia Eýropa odaǵynan Shengen viza alǵandar 19 qyrkúiek túngi 12-den bastap Estoniiaǵa kirmeidi.
"Litva, Latviia jáne Polsha da 19 qyrkúiekten bastap osyndai shekteý qoiady. Shengen vizańyz bolsa da, Estoniiaǵa kelmeńizder, munda sizderdi eshkim kútip turǵan joq" dedi Reinsalý Tallindegi baspasóz máslihatynda.
Shekteý tek týristik viza alǵandarǵa qoiylady, al Eýropa odaǵyna otbasylyq jáne gýmanitarlyq sebeppen kiretinderge shekteý joq.
Buǵan deiin Baltyq elderi shekaradan ótetin reseilik týrister "elge qaýip tóndiredi" dep málimdegen edi.
Resei Ýkrainaǵa basyp kirgen tusta Eýropa odaǵyndaǵy elder Eýropalyq komissiiadan reseilik týristerdi Shengen aimaǵyna kirgizýge tyiym salýdy suraǵan. 1 qyrkúiekte Pragada ótken EO elderiniń jiynynda ministrler reseilikterdi Eýropaǵa kirgizýge tyiym salýǵa kelise almady. Buǵan Batys Eýropa elderi, sonyń ishinde Germaniia, Grekiia, Kipr, Portýgaliia jáne Frantsiia qarsy shyqty. Onyń ornyna Eýropa odaǵy Reseimen jeńildetilgen jolmen viza berý kelisimin joiý týraly uiǵarymǵa keldi. Bul sheshimnen soń reseilikterge viza berý sharty qiyndaidy jáne viza quny eki ese ósedi.
Latviia, Litva, Finliandiia jáne Estoniia reseilikterdi elge kirgizýge tolyq tyiym salýdy qarastyramyz degen. Biraq Helsinki shekteý EO deńgeiinde salynýy kerek dep, bul ideiadan bas tartty. Degenmen Finliandiia reseilikterge beretin vizany azaitty.
