Foto: Aqorda
Eýropalyq Keńes Prezidenti Antoniý Koshta Memleket basshysymen kelissóz júrgizý úshin Aqordaǵa keldi, dep habarlaidy Ult.kz.
Mártebeli meimandy Qasym-Jomart Toqaev kútip aldy. Elimizge alǵash ret resmi saparmen kelgen Antoniý Koshtamen Prezident kezdesý ótkizdi.
Qazaqstan Prezidenti Keńeitilgen seriktestik jáne yntymaqtastyq týraly kelisimge qol qoiylǵanyna 10 jyl tolýymen tuspa-tus kelgen bul sapardyń simvoldyq mánge ie ekenine toqtaldy. Elimiz – Eýropa Odaǵymen osyndai tarihi kelisim jasaǵan óńirdegi tuńǵysh memleket.
– Sizdiń saparyńyzǵa erekshe mán beremiz. Bul Qazaqstan men Eýropa Odaǵy arasyndaǵy san qyrly yntymaqtastyqty odan ári keńeitýge qos taraptyń da daiyn ekenin kórsetedi. Biz ózara qurmet pen túsinistikke negizdelgen berik ári mazmundy seriktestikti qoldaimyz. Ózara saiasi dialogymyz ortaq múddemizge sáikes keletin kóptegen baǵyt boiynsha qarqyndy damyp keledi. Osy oraida birneshe kún buryn Briýsselde ótken «EO – Qazaqstan» yntymaqtastyq keńesi otyrysynyń nátijesine joǵary baǵa beremin, – dedi Memleket basshysy.
Toqaev byltyr ekijaqty taýar ainalymy shamamen 50 milliard dollarǵa jetkenin aitty. Al 2005 jyldan beri elimizge kelgen investitsiianyń jalpy kólemi 200 milliard dollarǵa jýyqtady. Eýropa Odaǵynyń Ortalyq Aziiamen saýda-sattyǵynyń 80 paiyzy Qazaqstanǵa tiesili.
Prezident energetika, kólik, tsifrlandyrý jáne ónerkásip salalarynda qyzmet etetin 4 myńnan astam eýropalyq kompaniianyń ekonomikamyzǵa qosqan úlesin atap ótti. Sonymen qatar Qazaqstannyń eýropalyq bizneske turaqty ári ashyq investitsiialyq klimatty qamtamasyz etýge beiil ekenin rastady.
Qasym-Jomart Toqaev gýmanitarlyq yntymaqtastyqqa airyqsha nazar aýdaryp, Eýropa Odaǵynyń bilim berý baǵdarlamalaryna rizashylyǵyn bildirdi. Onyń aiasynda 5 myńnan astam qazaqstandyq stýdent pen oqytýshy Eýroodaq elderinde bilimin jetildirip, tájiribeden ótýge múmkindik aldy.
Memleket basshysy vizalyq rejimdi jeńildetý jáne readmissiialar týraly kelisim jasaýǵa daiyndyq jumystary bastalǵanyn quptady.
Prezidenttiń aitýynsha, Qazaqstan Eýropa Odaǵy men Ortalyq Aziianyń S5+EO formatyndaǵy belsendi dialogyn qýattaidy. Atalǵan platforma ornyqty ósim jáne ózara bailanys salasyndaǵy ortaq múddelerdi ilgeriletýge jol ashty.
Memleket basshysy S5+ dialogy aimaqty damytýdaǵy basymdyqtardy júzege asyrýdyń tiimdi tetigine ainalǵanyn jetkizdi.
Óz kezeginde Antoniý Koshta qonaqjailyq tanytqany úshin Qasym-Jomart Toqaevqa rizashylyǵyn bildirdi. Sonymen qatar Qazaqstan men Eýropa arasyndaǵy yqpaldastyqtyń qarqyndy damyp kele jatqanyn atap ótip, Eýroodaqtyń elimizben jan-jaqty yntymaqtastyqty odan ári tereńdetýge daiyn ekenin rastady.
– Sońǵy 10 jylda Eýropa Odaǵy Qazaqstannyń eń iri saýda seriktesine jáne sheteldik investoryna ainaldy. Óz kezeginde Qazaqstan Eýropaǵa munai men ýran jetkizýshi elderdiń úshtigine kiretin el retinde ekonomikalyq qaýipsizdigimizdi qamtamasyz etýde negizgi ról atqarady. Búgin biz qarym-qatynasymyzdy nyǵaitýdyń jáne ekonomikalyq bailanystardy damytýdyń jańa kezeńine qadam basamyz, – dedi Eýropalyq Keńes Prezidenti.
Mártebeli meimannyń aitýynsha, Eýropa Odaǵy men Qazaqstan BUU Jarǵysynda bekitilgen mýltilateralizm men halyqaralyq tártip qundylyqtaryna arqa súieitin beibitshilik ustanymyn jaqtaidy.
Eýropalyq Keńes basshysy álemdegi qaýipsizdikti, turaqtylyq pen órleýdi qamtamasyz etetin kúsh-jiger dál osy qaǵidatta kórinis tapqanyn jetkizdi.
Antoniý Koshta Ortalyq Aziia elderimen yntymaqtastyq qazirgi kópjaqty álemdegi qarym-qatynasty ilgeriletýdiń mańyzdy faktoryna ainalǵanyn atap ótti. Bul rette ol Prezident Qasym-Jomart Toqaevtyń Kavkaz aimaǵyndaǵy beibitshilikti nyǵaitýǵa qosqan úlesin joǵary baǵalady. Onyń pikirinshe, óńirdegi qaýipsizdikti qamtamasyz etý Kavkaz jáne Qara teńiz arqyly Eýropaǵa shyǵatyn Transkaspii kólik dálizin damytýǵa tyń múmkindik beredi.
Kezdesýde ekijaqty qarym-qatynastyń aýqymdy máseleleri qarastyrylyp, kólik-logistika, tsifrlandyrý, energetika, mańyzdy mineraldar, aýyl sharýashylyǵy sekildi perspektivti baǵyttarǵa basa mán berildi.
