«Eýropa Odaǵy (EO) Iran biliginen oi-pikir erkindigi men azamattardyń jinalý erkindigin qurmetteýdi talap etip, qaqtyǵysýshy taraptardan zorlyq-zombylyqtan bas tartýǵa shaqyrady», dep málimdedi EO-nyń syrtqy saiasat jónindegi joǵarǵy komissary Federika Mogerini.
Vashington Irandaǵy narazylyq sherýlerinde tártipsizdik pen qaqtyǵystyń ulǵaiýna bailanysty BUU Qaýipsizdik keńesiniń shuǵyl jiynyn ótkizýdi talap etip otyr. AQSh-tyń BUU-daǵy turaqty ókili Nikki Heili narazylyq sherýlerine qatysýshylardyń qaza tabýyna bailanysty Jenevadaǵy adam quqyqtary jónindegi keńes te óz pikirin bildirýi tiis dep esepteidi. BUU-daǵy brifingte sóilegen Heili Iran demonstranttaryn «batyldyq tanytty» dep maqtap, búkil elge taraǵan narazylyq sharalary ózdiginen jáne aiaqasty týyndaǵanyn, oǵan syrtqy kúshterdiń qatysy joǵyn málimdedi. Buǵan deiin Irannyń rýhani kósemi aiatolla Áli Hamenei narazylyq sherýlerine bildirgen pikirinde «Irannyń jaýlary el biligine ziian keltirý úshin birikkenin» málimdegen bolatyn.
Irandaǵy narazylyq beisenbi, 28 jeltoqsanda Meshhedte bastalyp, birden basqa qalalarǵa jaiylǵan. Sodan beri sherýlerde kem degende 20 demonstrant pen bir politsiia qyzmetkeri qaza tapty. Tegeranda 30 jeltoqsanda 450-den astam demonstrant ustaldy.
Áýelde qymbatshylyq pen kúnkóristiń tómendep ketýine qarsy uranmen shyqqan sherýdiń sońy Irannyń joǵary basshysy sanalatyn rýhani jetekshisi aiatolla Áli Hameneidiń ishki saiasaty men Taiaý Shyǵystaǵy syrtqy saiasatyna narazylyqqa ulasty. Kóshege shyqqandar Hameneidiń portretterin jyrtyp, el basshylyǵyna qarsy urandaryn údete túsken.
Iran prezidenti Hassan Roýhani eldegi tártipsizdik pen qoǵamdyq menshiktegi múlikti búldirip-qiratýdy aiyptady. Biraq sonymen birge ol úkimetti azamattardyń "zańdy syn men narazylyq bildirýine múmkindik jasaýǵa" shaqyrdy. Roýhani Irandy árkim jeke pikirin aitýyna quqyǵy bar erkin el dep atady.
