Búgin UEFA Eýropa ligasy 2020/2021 jylǵy kezeńiniń alǵashqy irikteý satysynda shymkenttik «Ordabasy» óz alańynda Rýmyniianyń «Botoshani» klýbyn qabyldaidy, dep habarlaidy QazAqparat.
Aita keterligi, biyl jarystyń kelesi satysyna beriletin joldama jalǵyz oiyn nátijesi boiynsha anyqtalady. Kezdesý Shymkent qalasyndaǵy Q. Muńaitpasov atyndaǵy ortalyq stadionda ótkiziledi.
Rýmyniialyq klýb 2001 jyly qurylǵan. Alǵashqy jyldarda óz eliniń fýtboldan chempionatynyń ekinshi ligasynda oiyn kórsetti. 2013 jyly sol ligada birinshi oryn alyp, óz tarihynda tuńǵysh ret joǵary ligaǵa kóterildi.
Sodan bergi ýaqytta ekinshi ligaǵa qaitadan tómen túsip kórgen emes.
Negizinen týrnir kestesinde 8-10 oryndardy qanaǵat tutyp keledi. 2015 jyly komanda tuńǵysh ret Eýropa ligasynda baq synaýǵa múmkindik aldy.
Sol jyly «Botoshani» segizinshi oryndy qanaǵat tutqan edi. Dese de odan burynǵy tórt komanda UEFA tarapynan beriletin litsenziiaǵa qol jetkize alǵan joq.
Eýropa ligasynyń 2015/2016 jylǵy kezeńiniń birinshi irikteý satysynda «Botoshani» Grýziianyń «Spartak-Tshinvali» komandasymen kezdesti. Óz alańynda 1:1 esebimen teń túsip, syrt alańda 3:1 esebimen jeńiske jetti. Jarystyń ekinshi satysynda Polshanyń «Legiiasymen» jolyǵyp, eki oiynda 0:1, 0:3 esebimen jeńildi. Sodan keiin rýmyniialyq klýb eýrokýbok dodasynda biyl boi kórsetip otyr. Sońǵy chempionatta olar týrnir kestesinde tórtinshi orynǵa taban tiregen bolatyn.
«Botoshani» komandasynda negizinen jergilikti fýtbolshylar oiyn kórsetedi. Sondai-aq, komanda quramynda Argentina, Albaniia, Grekiia, Horvatiia, Soltústik Makedoniia, Avstriia elderinen kelgen oiynshylar bar.
Aita keterligi, «Ordabasy» Eýropa ligasynda biyl altynshy márte baq synaidy. Shymkenttik klýb 2012, 2019 jyldarda jarystyń ekinshi satysyna deiin jetti.
«Ordabasy» men «Botoshani» klýbtary arasyndaǵy kezdesý elorda ýaqytymen 20.00-de bastalady. Oiyn «Elarna» telearnasynan tikelei efirde kórsetiledi.
Sondai-aq, búgin jarystyń atalǵan satysynda Almatynyń «Qairaty» óz alańynda Armeniianyń «Noa» komandasyn qabyldaidy.
