بٷگٸن UEFA ەۋروپا ليگاسى 2020/2021 جىلعى كەزەڭٸنٸڭ العاشقى ٸرٸكتەۋ ساتىسىندا شىمكەنتتٸك «ورداباسى» ٶز الاڭىندا رۋمىنييانىڭ «بوتوشاني» كلۋبىن قابىلدايدى, دەپ حابارلايدى قازاقپارات.
ايتا كەتەرلٸگٸ, بيىل جارىستىڭ كەلەسٸ ساتىسىنا بەرٸلەتٸن جولداما جالعىز ويىن نەتيجەسٸ بويىنشا انىقتالادى. كەزدەسۋ شىمكەنت قالاسىنداعى ق. مۇڭايتپاسوۆ اتىنداعى ورتالىق ستاديوندا ٶتكٸزٸلەدٸ.
رۋمىنييالىق كلۋب 2001 جىلى قۇرىلعان. العاشقى جىلداردا ٶز ەلٸنٸڭ فۋتبولدان چەمپيوناتىنىڭ ەكٸنشٸ ليگاسىندا ويىن كٶرسەتتٸ. 2013 جىلى سول ليگادا بٸرٸنشٸ ورىن الىپ, ٶز تاريحىندا تۇڭعىش رەت جوعارى ليگاعا كٶتەرٸلدٸ.
سودان بەرگٸ ۋاقىتتا ەكٸنشٸ ليگاعا قايتادان تٶمەن تٷسٸپ كٶرگەن ەمەس.
نەگٸزٸنەن تۋرنير كەستەسٸندە 8-10 ورىنداردى قاناعات تۇتىپ كەلەدٸ. 2015 جىلى كوماندا تۇڭعىش رەت ەۋروپا ليگاسىندا باق سىناۋعا مٷمكٸندٸك الدى.
سول جىلى «بوتوشاني» سەگٸزٸنشٸ ورىندى قاناعات تۇتقان ەدٸ. دەسە دە ودان بۇرىنعى تٶرت كوماندا UEFA تاراپىنان بەرٸلەتٸن ليتسەنزيياعا قول جەتكٸزە العان جوق.
ەۋروپا ليگاسىنىڭ 2015/2016 جىلعى كەزەڭٸنٸڭ بٸرٸنشٸ ٸرٸكتەۋ ساتىسىندا «بوتوشاني» گرۋزييانىڭ «سپارتاك-تسحينۆالي» كومانداسىمەن كەزدەستٸ. ٶز الاڭىندا 1:1 ەسەبٸمەن تەڭ تٷسٸپ, سىرت الاڭدا 3:1 ەسەبٸمەن جەڭٸسكە جەتتٸ. جارىستىڭ ەكٸنشٸ ساتىسىندا پولشانىڭ «لەگيياسىمەن» جولىعىپ, ەكٸ ويىندا 0:1, 0:3 ەسەبٸمەن جەڭٸلدٸ. سودان كەيٸن رۋمىنييالىق كلۋب ەۋروكۋبوك دوداسىندا بيىل بوي كٶرسەتٸپ وتىر. سوڭعى چەمپيوناتتا ولار تۋرنير كەستەسٸندە تٶرتٸنشٸ ورىنعا تابان تٸرەگەن بولاتىن.
«بوتوشاني» كومانداسىندا نەگٸزٸنەن جەرگٸلٸكتٸ فۋتبولشىلار ويىن كٶرسەتەدٸ. سونداي-اق, كوماندا قۇرامىندا ارگەنتينا, البانييا, گرەكييا, حورۆاتييا, سولتٷستٸك ماكەدونييا, اۆسترييا ەلدەرٸنەن كەلگەن ويىنشىلار بار.
ايتا كەتەرلٸگٸ, «ورداباسى» ەۋروپا ليگاسىندا بيىل التىنشى مەرتە باق سىنايدى. شىمكەنتتٸك كلۋب 2012, 2019 جىلداردا جارىستىڭ ەكٸنشٸ ساتىسىنا دەيٸن جەتتٸ.
«ورداباسى» مەن «بوتوشاني» كلۋبتارى اراسىنداعى كەزدەسۋ ەلوردا ۋاقىتىمەن 20.00-دە باستالادى. ويىن «ەلارنا» تەلەارناسىنان تٸكەلەي ەفيردە كٶرسەتٸلەدٸ.
سونداي-اق, بٷگٸن جارىستىڭ اتالعان ساتىسىندا الماتىنىڭ «قايراتى» ٶز الاڭىندا ارمەنييانىڭ «نوا» كومانداسىن قابىلدايدى.
