Eýropa ligasynda synǵa túsetin «Astana» jáne «Qaisar» klýbtarynyń qarsylastary elimizge keldi, dep habarlaidy "Ult aqparat".
Esterińizge sala ketelik, atalǵan týrnirdiń ekinshi irikteý satysynda óz alańynda «Astana» - Chernogoriianyń «Býdýchnost», «Qaisar» - Kiprdiń APOEL klýbtaryn qabyldaidy. Sondai-aq, Almatynyń «Qairaty» Izrailde «Makkabi» (Haifa) komandasymen sheberlik baiqasady.
«Astana» biyl segizinshi márte baq synap otyr. 2015 jyly Chempiondar ligasy toptyq kezeńinde oinasa, 2016, 2017, 2018, 2019 jyldarda Eýropa ligasy toptyq kezeńinde el namysyn qorǵady. 2017 jyly Eýropa ligasynda týrnirdiń 1/16 finalyna deiin jetti.
«Astana» men «Býdýchnost» komandalary arasyndaǵy oiyn erteń 17 qyrkúiek elorda ýaqytymen saǵat 20.00-de bastalady. Kezdesý Almaty qalasyndaǵy ortalyq stadionda ótkiziledi.
«Qaisar» eýrokýbok oiyndarynda tuńǵysh márte qatysady. Komanda byltyr Qazaqstan kýbogyn tóbesine kóterdi. Qyzylordalyq klýb 1999, 2000 jyldarda Aziia kýbok ieleri kýbogynda elimizdiń atynan qatysqan bolatyn.
«Qaisar» men APOEL komandalary arasyndaǵy oiyn 17 qyrkúiekte elorda ýaqytymen 18.00-de bastalady. Kezdesý Shymkent qalasyndaǵy Q.Muńaitpasov atyndaǵy stadionda bolady.
Al «Qairat» eýrokýbok oiyndaryna biyl onynshy márte qatysady. 2005 jyly Chempiondar ligasy birinshi irikteý satysynda baq synady. Qalǵanynda Eýropa ligasy (ÝEFA kýbogy) týrnirinde el namysyn qorǵady.
«Makkabi» (Haifa) men «Qairat» arasyndaǵy kezdesý erteń elorda ýaqytymen 23.00-de bastalady.
Qazaqstandyq klýbtardyń qatysýymen ótetin barlyq oiyn «Qazsport» telearnasynan tikelei efirde kórsetiledi.
