Keibir elderde infektsiia juqtyrǵandar sany qaita kóbeiip ketkendikten, Eýropa koronavirýstyń ekinshi tolqynyna daiyndalyp jatyr, iaǵni shekteý sharalary qaita engizilýi múmkin.
Bul týraly The Guardian gazeti habarlady. Belgiia úkimeti 17 men 23 shilde aralyǵynda infektsiiaǵa shaldyqqandar sany 163-ten 279-ǵa deiin, 71%-ǵa artqandyqtan, elde qatań karantin erejesi engizilýi múmkin ekenin eskertti.
«Eger biz koronavirýstyń taralýyn tejei almasaq, bul ujymdyq sátsizdik bolady», - dedi Belgiia premer-ministri Sofi Vilmes ulttyq qaýipsizdik keńesi otyrysynyń qorytyndysy boiynsha.
Sonymen qatar ol azamattardy múmkindiginshe úiden jumys isteýge shaqyrdy. Ispaniianyń Kataloniia aimaǵy 10 kún ishinde COVID-19 jaǵdaiy turaqtalmasa, qaitadan shekteý sharalaryn engizýi múmkin. Bul óńirde infektsiia klýb pen barda demalýshylar arasynda, sondai-aq jemis-jidek pen kókónis jinaityn maýsymdyq jumysshylar arasynda taraǵany anyqtaldy. Keiingi eki aptada Kataloniiada 8 myńǵa jýyq virýs juqtyrý oqiǵasy tirkeldi, Ispaniiada bul kórsetkish 16 myńǵa jetti. Osyǵan bailanysty óńir biligi barlyq túngi klýbtardy jaýyp, Barselona men Lerida barlaryna túngi «kommendanttyq saǵat» engizdi.
Frantsiianyń densaýlyq saqtaý ministri Olive Veran virýs jastar arasynda keń tarap jatqandyqtan, saq bolýǵa shaqyrdy. Al Germaniia qoǵamdyq densaýlyq saqtaý konsýltativtik organy keiingi birneshe aptada syrqattanǵandar sanynyń artyp ketkenine alańdap otyrǵanyn jetkizdi.
Dúniejúzilik densaýlyq saqtaý uiymy (DDSU) Eýropa óńirlik biýrosynyń direktory Hans Kliýge The Daily Telegraph gazetine bergen suhbatynda Eýropa elderi koronavirýs infektsiiasynyń ekinshi tolqynyna daiyndalyp, densaýlyq saqtaý júiesin nyǵaityp, meditsinalyq mekemelerdiń, alǵashqy meditsinalyq-sanitarlyq kómekti jáne qarqyndy terapiia bólimsheleriniń áleýetin arttyrý kerek ekenin málimdedi.
Onyń aitýynsha, kúzde qurlyq koronavirýstyń ekinshi tolqynymen kúresip, oǵan maýsymdyq tumaý men qyzylsha qosylýy múmkin.
