Fýtboldan Eýropa chempionatynyń finaldyq satysynyń toptyq kezeńi máresine jetti. Jarystyń 1/8 finalyna shyqqan quramalar tolyq belgili boldy, dep habarlaidy "Ult aqparat".
Toptyq kezeńdegi sońǵy oiyn kúninde E jáne F tobyndaǵy quramalar sheberlik baiqasty.
E tobynda alǵashqy eki týrda nebári eki upaidy qanaǵat tutqan Ispaniia úshinshi týrda Slovakiiany 5:0 esebimen tas-talqan etip jeńdi. Aldymen 30-minýtta slovakiialyq Martin Dýbravka óziniń qaqpasyna gol soǵyp alsa, odan keiin Ispaniia sapynan Emerik Laport 45-minýtta esepti ústemelei tústi. Al olardyń qatarynan Pablo Sarabiia 56, Ferran Torres 67-minýtta mergendik tanytsa, 71-minýtta slovakiialyq Iýrai Kýtska taǵy bir avtogoldyń avtory atandy.
Atalǵan toptaǵy Shvetsiia men Polsha kezdesýinde de bes soǵyldy. Oiyn barysynda shvetsiialyq Emil Forsberg 2, 59-minýttarda dáldik kórsetse, 61, 84-minýttarda polshalyq Robert Levandovski eki gol soqty. Shvetsiiaǵa jeńis alyp kelgen dopty 93-minýtta Viktor Klasson óziniń enshisine jazdy. Osylaisha olar qarsylasyn 3:2 esebimen tize búktirdi. Bul topta 7 upaimen Shvetsiia kósh bastasa, ekinshi oryn 5 upaiy bar Ispaniiaǵa buiyrdy.
F tobynda da plei- off satysyna tartysty báseke júrdi. Jankúierler aldymen Portýgaliia men Frantsiia kezdesýine kóz tikti. Kezdesý barysynda qos qurama qaqpasyna úsh penalti belgilenip, olardyń barlyǵy tolyqtai oryndaldy. Portýgaliialyq Krishtianý Ronaldý 30, 60-minýttarda penaltiden múlt ketken joq. Osylaisha ol qurama sapynda óziniń 109-golyn soǵyp, álemdik rekordta ózgeris engizdi. Budan buryn mundai kórsetkish irandyq Ali Daeidiń enshisine jazylǵan bolatyn.
Al Frantsiia quramynan Karim Benzema 45-minýtta sondai múmkindikti paidalansa, 47-minýtta oiyn barysynan gol soǵyp ketti.
Oiynda 2:2 esebi tirkelip, qos qurama da plei-off satysyna joldama aldy.
Atalǵan toptaǵy taǵy bir kezdesýde Vengriia quramasy Germaniiaǵa qarsy jigerli oiyn kórsetti. Olardyń qatarynan Adam Salai 11-minýtta esep ashsa, nemis fýtbolshysy Kai Haverts 66-minýtta tarazy basyn teńestirgen edi. Degenmen 68-minýtta Andrash shefer qaitadan Vengriiany alǵa shyǵardy. Al 84-minýtta nemis fýtbolshysy Leon Goretska taǵy da esepti teńestirdi. Oiynda 2:2 esebimen teń tústi. Germaniia ekinshi oryn alyp, plei-off satysyna shyqty.
Jarystyń 1/8 finalynda Ýels pen Daniia, Italiia men Avstriia, Niderlandy men Chehiia, Belgiia men Portýgaliia, Horvatiia men Ispaniia, Frantsiia men Shveitsariia, Angliia men Germaniia, Shvetsiia men Ýkraina kezdesetin boldy.
Endi 1/8 final oiyndary 26-29 maýsym kúnderi ótkiziledi.
Oiyndar dúbirli doda tarihynda tuńǵysh ret Eýropanyń 10 memleketinde ornalasqan 11 stadionda ótýde. Bul Eýropa chempionatynyń 60 jyldyq mereitoiyna orai uiymdastyrylǵan.
Fýtboldan Eýropa chempionaty 11 maýsymda bastaldy, ol 11 shildede máresine jetedi.
