Búgin fýtboldan Eýropa chempionatynyń alǵashqy jartylai finalynda Angliia men Daniia quramalary kezdesedi, dep habarlaidy "Ult aqparat".
Eki qurama buǵan deiin 21 márte kezdesti. Onyń 12-de aǵylshyndar jeńiske jetip, 4-de daniialyqtar basym tússe, qalǵanynda teń nátije tirkeldi.
Aita keterligi, sońǵy eki kezdesýde Angliia atalǵan qarsylasyn jeńe almai keledi. 2020/21 jylǵy Ulttar ligasynda olar syrt alańda 0:0 esebimen teń tússe, óz alańynda 1:2 esebimen jol berip qoidy.
Atalǵan match Angliianyń London qalasyndaǵy «Ýembli» stadionynda ótkiziledi.
Oiynda niderlandylyq Danni Makkeli bas qazy qyzmetin atqarady. Oǵan otandastary Hessel Stegstra men Ian de Vris kómekshilik jasaidy. Qosalqy tóreshi - rýmyniialyq Ovidiý Hatsegan.
Oiyn elorda ýaqytymen 23.50-de bastalyp, «Qazaqstan» jáne «Qazsport» telearnalarynan tikelei efirde kórsetiledi.
