Búgin fýtboldan 2020 jylǵy Eýropa chempionatynyń finaldyq kezeńindegi ekinshi oiyn kúnin Resei jáne Belgiia quramalary túiindedi, dep habarlaidy "Ult aqparat".
Atalǵan match Reseidiń Sankt-Peterbýrg qalasynda ótti.
Oiyn barysynda qos quramanyń alma-kezek shabýyly kózge tústi. Dese de belgiialyq quramanyń basymdyǵy ańǵarylyp turdy.
Belgiialyq qurama sapynan Romelý Lýkaký 10-minýtta esep ashsa, 34-minýtta Toma Mione esepti ústemelei tústi.
Ekinshi kezeńde reseilik fýtbolshylar alǵa qarai umtyldy. Oǵan belgiialyqtar óz deńgeiinde qarsylyq kórsetti. Keibir sátterde olar da basymdyǵyn arttyrdy. Romelo Lýkaký 88-minýtta taǵy bir márte mergendik tanytyp, kezdesýdiń núktesin qoidy. Osylaisha Belgiia qarsylasynan 3:0 esebimen basym tústi.
Eske salsaq, eki qurama V tobynda synǵa túsedi. Atalǵan topta Finliandiia Daniiadan 1:0 esebimen basym túskenin buǵan deiin jazǵan bolatynbyz.
Bul toptaǵy kelesi kezdesý 16 jáne 17 maýsym kúnderi ótkiziledi. Aldymen 16 maýsymda Finliandiia men Resei jasyl alańǵa shyqsa, 17 maýsymda Daniia men Belgiia kúsh baiqasady.
Biylǵy birinshilikte barlyǵy 24 qurama synǵa túsedi. Árbir toptan úzdik eki komanda men kórsetkishi joǵary tórt qurama jarysty jalǵastyrýǵa múmkindik alady. Oiyndar dúbirli doda tarihynda tuńǵysh ret Eýropanyń 10 memleketinde ornalasqan 11 stadionda bolady. Bul Eýropa chempionatynyń 60 jyldyq mereitoiyna orai uiymdastyrylǵan.
Fýtboldan Eýropa chempionaty 11 maýsymda bastaldy, 11 shildede máresine jetedi.
