Eýropamen qatynasty nyǵaitýdy kózdeitin, reseishil separatister shoǵyrlanǵan aýmaǵynda territoriialyq tutastyq máselesine alańdaityn eki kórshi Ýkraina men Moldova basshylary ózara áriptestikti nyǵaitýdy josparlap otyr.
Moldovanyń jańa prezidenti Maiia Sandý 12 qańtarda Kievke saparlap, Ýkraina basshysy Vladimir Zelenskiimen kezdesti. Jemqorlyqpen kúres baǵdarlamasy arqyly reseishil kandidat Igor Dodondy sailaýda basymdyqpen jeńip, ótken aida inaýgýratsiiasy ótken eýropashyl Sandý prezident retinde óziniń alǵashqy saparyn Ýkrainadan bastaǵan.
Dodon tusynda Moldovanyń Ýkraina jáne Rýmyniiamen qarym-qatynasy álsiregen. Zelenskiimen kezdesý kezinde Moldova basshysy “dostyqty qaita jańǵyrtý” týraly aitty.
“Ýkraina Moldovanyń strategiialyq áriptesi ekenin taǵy eske salǵym keledi. Moldova Ýkrainamen turaqty ári pragmatikalyq qatynasty damytýǵa basymdyq beredi. Biz búgin qarym-qatynasty jańa bir deńgeige – strategiialyq áriptestik deńgeiine kóterý týraly keliskenimizdi qýanyshpen habarlaimyn” dedi Sandý.
Eki el arasyndaǵy ekijaqty áriptestikti damytý úshin memleket basshysy deńgeiinde keńes te qurylǵan. Dúniejúzilik banktiń burynǵy ekonomisi buǵan deiin reseishil separatister shoǵyrlanǵan Pridnestroveden Resei áskerin áketýge shaqyryp, Kremldi alańdatqan.
Ýkraina da Eýropamen tyǵyz qarym-qatynasty qoldaidy. 2014 jyly Resei Qyrym túbegin basyp alyp, Ýkraina shyǵysyndaǵy separatisterdi qoldaǵannan keiin Kiev pen Máskeý arasy salqyndaǵan.
Kezdesýden keiin Zelenskii taraptardyń Eýroodaqqa qosylýdy ortaq strategiialyq maqsat retinde talqylaǵanyn aitty.
