8 mamyrdaǵy elshiler kezdesýinde Eýroodaq elderi Reseige jańa sanktsiia salý boiynsha ortaq toqtamǵa kele almady. Resei munaiyn importtaý men tasymaldaýǵa shek qoiý usynysyna Vengriia, Grekiia jáne Kipr qarsy bolyp otyr. Anonim derekkózge silteme jasaǵan Bloomberg osyndai aqparat taratty, dep jazady Azattyq.
Ýkrainaǵa áskeri shabýyl jasaǵany úshin Reseige qarsy sanktsiianyń altynshy legi bul eldiń munaiyn satyp alýǵa jáne tasymaldaýǵa tyiym salady. Ekonomikasy Reseiden keletin otynǵa kóp táýeldi Vengriia, Chehiia jáne Slovakiiaǵa importty almastyrý boiynsha 2024 jylǵa deiin jeńildik kózdelgen. Vengriia bul jeńildiktiń ózi az dep, basqa elderden otyn tasý shyǵynynyń ornyn toltyrýdy talap etip otyr.
Tanker flotynyń edáýir bóligine baqylaý jasaityn Kipr men Grekiia Eýroodaqta munai tasymalyna tyiym salmai turyp aldymen G7 elderine osyndai shek qoiýy kerek dep sanaidy.
Jańa sanktsiialar Resei munaiyna embargo jariialap, ol eldiń munaiyn tasymaldaýǵa jáne olarǵa saqtandyrý qyzmetin kórsetýge tyiym salýdy kózdeidi. Buǵan qosa Reseidiń úsh memlekettik telearnasyn kórsetýge shek qoiylady, "Sberbank" jáne taǵy eki iri bank SWIFT bankaralyq kommýnikatsiia júiesinen ajyratylady jáne Eýroodaqta rezidenttigi joq Resei azamattarynyń EO aýmaǵynan jyljymaityn múlik alýyna bolmaidy.
Vengriia basshylyǵy Resei otynyn tasymaldaýǵa tyiym salý usynysyna qarsy bolatynyn birneshe ret aitqan. Eýroodaq sanktsiialary kúshine enýi úshin ony odaq músheleri biraýyzdan qoldaýy kerek.
