Eýroodaq Qyrǵyzstandaǵy sailaý týraly málimdeme jasady. Bul týraly odaqtyń Qyrǵyzstandaǵy ókilettigi habarlady. Málimdemede Eýroodaqtyń Qyrǵyzstan ortalyq sailaý komissiiasynyń 4 qazandaǵy sailaý nátijesin jaramsyz dep tabýyn eskergeni aitylady.
"Eýroodaq eldegi barlyq saiasi kúshterdi konstitýtsiia aiasynda áreket etip, qaishylyqty beibit jolmen áreket etýge shaqyrady. Biz Qyrǵyzstannyń halyqaralyq mindettemeleri men azamattarynyń demokratiialyq quqyqtaryna sáikes keletin jańa, senimge laiyq, ashyq jáne jalpyhalyqtyq sailaýdy taǵatsyzdana kútemiz" delingen málimdemede.
Eýroodaq sondai-aq Qyrǵyzstannyń demokratiialyq joly men damýyn el táýelsizdik alǵaly qoldap kele jatqanyn, elge qoldaý kórsetýdi odan ári de jalǵastyra beretinin málimdedi.
5 qazan kúni el astanasy Bishkekte parlament sailaýynyń nátijesimen kelispeitin saiasi partiialardyń mitingi ótti. Olar 4 qazandaǵy sailaýdyń nátijesin jaramsyz dep taýyp, jańa sailaý ótkizýdi talap etti. Keiinirek bul aktsiia demonstranttar men quqyq qorǵaý organy qyzmetkerleri arasyndaǵy qaqtyǵysqa ainaldy. Tún ortasynda sherýshiler ulttyq qaýipsizdik komitetiniń ǵimaratyn jáne prezident pen parlament rezidentsiialaryn basyp aldy. Osy túni narazy top qamaýda otyrǵan birqatar saiasatkerdi túrmeden bosatyp aldy. Olardyń qatarynda Qyrǵyzstannyń paraqorlyq aiybymen 11 jylǵa sottalǵan burynǵy prezidenti Almazbek Atambaev, burynǵy premer-ministr Sapar Isakov, Jogorký Keńeshtiń burynǵy depýtattary Ravshan Djeenbekov jáne Sadyr Japarov bar.
6 qazan kúni Ortalyq sailaý komissiiasy 4 qazandaǵy sailaýdyń nátijesin joqqa shyǵaratynyn málimdedi.
