Búgin Eýropanyń Dári-dármek jónindegi agenttigi (EMA) AstraZeneca farmakologiialyq kompaniiasynyń koronavirýsqa qarsy vaktsinasyn qoldanýǵa keńes berdi, dep habarlady "Ult aqparat".
AstraZeneca – bul endi Eýroodaqta qoldanýǵa ruqsat etilgen úshinshi vaktsina («Pfizer/BioNTech» jáne «Moderna» vaktsinalarynan keiin).
Eýropanyń Dári-dármek jónindegi agenttigi ázirge 55 jastan asqan adamdar toby úshin qorǵanys deńgeiin anyqtaityn zertteý qorytyndylary jetkiliksiz ekenin málimdedi. Alaida, «basqa vaktsinalar týraly bilgenimiz ben synaýdyń aǵymdaǵy qorytyndylaryna negizdelip, osy maqsatty toptan da qorǵanys kútip otyrmyz» - delingen EO ókiletti organynyń málimdemesinde.
«Onyń qaýipsiz ekeni týraly rastalǵan aqparat bar. Bizdiń mamandarymyz vaktsinany qart adamdarǵa da egýge bolady dep sanaidy. Qosymsha aqparat jasy odan da úlken adamdardyń qatysýymen ótetin aǵymdaǵy zertteýler barysynda keledi», - dep habarlady EMA ókili.
«Úshinshi oń qorytyndyny ala otyryp, biz EO-ǵa múshe memleketter úshin qoljetimdi vaktsinalar arsenalyn odan da kóp keńeittik», - dedi EMA-nyń atqarýshy direktory Emer Kýk.
AstraZeneca vaktsinasy adam aǵzasyna 4-ten 12 aptaǵa deiingi ýaqytsha kezeńde eki inektsiiamen engiziledi. Bul meditsinalyq preparat Ulybritaniiada qoldanylyp júr.
