Ótken aptada Italiia, Germaniia siiaqty Eýropa elderinde koronavirýspen aýyrǵan adamdar sany 60% artty. Bul týraly Ortalyq kommýnikatsiialar ortalyǵynda ótken onlain brifingide QR Densaýlyq saqtaý ministrliginiń resmi ókili Baǵdat Qojahmetov aitty, dep habarlaidy "Ult aqparat".
«Búgin Elbasy Úkimettiń aldyna jáne Densaýlyq saqtaý ministrligine birqatar tapsyrma berdi. Sonyń ishinde aldyńǵy orynda PTR testiniń jáne meditsinalyq maskanyń baǵasyn tómendetý tapsyrmasy tur. Basqa eldermen salystyryp qaraǵanda, elimizde maskanyń baǵasy 60 teńgeniń tóńireginde bolsa, Reseide 20 teńge eken. Bul qarjylyq másele bolǵandyqtan basqa ministrliktegi áriptester bul máseleni sheshýge kirisedi dep oilaimyn», - deidi QR Densaýlyq saqtaý ministrliginiń resmi ókili Baǵdat Qojahmetov.
Onyń aitýynsha, sońǵy 2-3 aida Qazaqstanda maskanyń baǵasy 2-3 ese arzandady.
«Qazirgi ýaqytta Qazaqstanda kúndelikti 40 myń PTR test ótkizý múmkindigimiz bar. Jyl sońna deiin onyń sany 67 myńǵa deiin ósedi. Neǵurlym kóp adam PTR testiden ótse, soǵyrlym jaǵdai belgili bolyp, nátijege bailanysty sheshim qabyldanady. Sol sheshimniń arqasynda elimizdi indetten qorǵaý múmkindigi týady», - deidi ol.
Sondai-aq, ol kórshi memleketterde jaǵdai edáýir qiyndap kele jatqanyn aitty.
«Ótken aptada Italiia, Germaniia siiaqty Eýropa elderinde koronavirýspen aýyrǵan adamdar sany 60% artty. Reseide sońǵy táýlikte 11 615 adam aýrýǵa shaldyqsa, Túrkiiada kúnine 1 603 jaǵdai tirkelýde. Jalpy Eýroodaqqa kiretin elderde Qazaqstanmen salystyrǵanda koronavirýspen aýyrǵan adamdardyń sany 13 ese kóp. Sondyqtan óte saq bolýymyz kerek», - deidi Baǵdat Qojahmetov.
