Eýroodaqqa múshe elderdiń turaqty ókilder komiteti Belarýstaǵy sailaý qorytyndysyn burmalaý men beibit sherýge shyqqandarǵa kúsh qoldanýǵa jaýapty 15 tulǵaǵa sanktsiia salýdy maquldady. Arasynda Aleksandr Lýkashenko da bar.
Azattyqtyń Orys qyzmetiniń Briýsseldegi tilshisi Rikard Iozviaktyń habarlaýynsha, sanktsiia salynǵan sheneýnikterge Eýropa aýmaǵyna kirýge tyiym salynady, aktivteri buǵattalady.
TASS agenttiginiń jazýynsha, bul sheshimdi jaqyn arada Eýropa keńesi bekitedi. Aqparat boiynsha, sheshim 6 qarashada Eýroodaqtyń arnaiy jýrnalynda jariialanady.
Eýroodaq osyǵan deiin de mundai tizimdi jasap, bekitken edi. Biraq oǵan Lýkashenko kirmegen bolatyn. Belarýs syrtqy ister ministrligi buǵan jaýap retinde Eýroodaqqa qarsy sanktsiia salatynyn málimdegen.
Sanktsiia Belarýsta 9 tamyz kúngi prezident sailaýynan keiin qalyptasqan jaǵdaiǵa bailanysty engizilip otyr. Ortalyq sailaý komissiiasy prezident sailaýynda Aleksandr Lýkashenkonyń 6-ret jeńiske jetkenin habarlaǵannan keiin turǵyndar kóshege shyǵyp, sailaý qorytyndysynyń burmalanǵanyn aitqan. Arnaiy jasaq qarsy shyqqandardy kúshpen ustap, quqyq qorǵaýshylar túrme men qamaý oryndarynda azaptaý men uryp-soǵý faktilerin tirkegen.
Narazylyq aktsiialaryna qaramastan 23 qyrkúiekte Lýkashenko jasyryn inaýgýratsiiasyn ótkizdi. Eýroodaqqa múshe birqatar elder, AQSh, Ýkraina Lýkashenkony eldiń zańdy prezidenti dep tanýdan bas tartty. 29 qyrkúiekte Ulybritaniia men Kanada Belarýs biligine sanktsiia saldy. Buǵan deiin Latviia, Litva jáne Estoniia shamamen 130 belorýs sheneýnigin "qara tizimge" engizgen.
