Belarýste prezident sailaýy erkin ári ádil ótpedi. Belarýs prezidenti Aleksandr Lýkashenkonyń "jasyryn inaýgratsiiasynan" keiin Eýroodaq osylai dep málimdep, sailaý nátijesin moiyndamaitynyn qaitalady. Osy tusta EO Belarýspen qarym-qatynasyn qaita qarastyrady. Eýroodaqtyń syrtqy ister jáne qaýipsizdik saiasat jónindegi joǵarǵy ókili Jozep Borreldiń málimdemesinde osylai dep aitylady.
Málimdemede Lýkashenko inaýgýratsiiasy belorýs halqynyń aitarlyqtai bóliginiń erkine qaishy keledi jáne bul sailaýdan keiin jalǵasyp jatqan myńdaǵan adam qatysqan beibir sherýler men aktsiialardan kórinip jatyr, bul elde saiasi daǵdarysty tereńdete túsedi dep jazylǵan.
"Biliktiń dóreki kúsh qoldanyp, qýdalaǵanyna qaramastan negizgi quqyqtary men demokratiiany beibit túrde talap etip otyrǵan belorýs halqynyń batyldyǵyna súisinip otyrmyz" delingen málimdemede.
Eýroodaq belorýs halqynyń erkin ári ádil sailaý arqyly prezidentti sailaý quqyǵyn qoldaidy dep jazylǵan.
Sársenbi kúni Minskidegi Táýelsizdik saraiynda ótken sharada Lýkashenko ant berip, prezident qyzmetine kirisken. Inaýgýratsiia jaily aldyn ala habarlanbady. Memlekettik BelTA agenttiginiń aqparatynsha, oǵan sheneýnikter, depýtattar, aqparat quraldarynyń basshylary, ǵylym, mádeniet, sport qairatkerleri qatysqan.
Belarýstegi prezident sailaýyna qatysqan oppozitsiia jetekshisi Svetlana Tihanovskaia inaýgýratsiiany "fars" dep atady.
Sársenbi kúni Minsk pen Belarýstiń ózge qalalarynda inaýgýratsiiaǵa qarsy narazylyq aktsiialary ótti. 250-den astam adam ustalǵan. 200-i Minskide ustalǵan. Munda arnaiy jasaq demonstranttardy taratý úshin sý shashqan.
