Eýropalyq Odaq (EO) Belarýs úshin bólingen 3 milliard eýro mólsherindegi investitsiialyq kómekti toqtatyp qoidy, - dep habarlaidy Reuters.
Bul týraly Eýropalyq komissiia tóraǵasy Ýrsýla fon der Liaien Briýsselde ótken EO kóshbasshylary kezdesýi aldynda málimdedi. Onda Belarýske qarsy jańa sanktsiialar engizý týraly másele qaraldy.
"EO-nyń Belarýs úshin 3 milliard eýro investitsiialyq jáne ekonomikalyq kómegi bar, ol Belarýs demokratiialyq el bolǵanǵa deiin toqtaidy", - dedi ol Twitter-paraqshasynda.
Eýrokomissiia basshysy jańa sanktsiialar Ryanair ushaǵyn májbúrlep qondyrýǵa qatysy bar adamdarǵa, el basshylyǵyn qarjylandyratyn kásiporyndar men sharýashylyq júrgizýshi sýbektilerge jáne Belarýs aviatsiialyq sektoryna baǵyttalýy múmkin ekenin aitty.
Sonymen qatar, EO-ǵa kiretin 27 el basshysy búgingi sammittiń qorytyndysy boiynsha oppozitsiia jetekshisi Roman Protasevich pen onyń qyzy Sofiia Sapegany tez arada bosatýǵa shaqyrdy.
Eske salaiyq, 23 mamyrda kúndiz Ryanair áýe kompaniiasynyń Afinadan Vilniýske ushyp bara jatqan ushaǵy Minskide shuǵyl qonǵan. "Ushaq bomba qoiyldy degen habardan keiin qondyryldy", - delingen áýejai habarlamasynda.
Ushaq bortynda jýrnalist, Nexta telegram-arnasynyń burynǵy bas redaktory Roman Protasevich bolǵan. Keiin Roman Protasevich otyrǵan Ryanair áýekompaniiasynyń ushaǵyn qondyrý týraly buiryqty Belarýs prezidenti Aleksandr Lýkashenko bergeni anyqtaldy.
Batys elderi tez arada Nexta negizin qalaýshysyn bosatýdy talap etti. Nexta 2020 jylǵy tamyzda Belarýstegi prezidenttik sailaýdyń nátijeleri jariialanǵannan keiin jappai narazylyq kezinde oppozitsiianyń negizgi alańdarynyń biri boldy.
We have a 3 billion euro economic and investment package ready to go for Belarus, when it becomes democratic. pic.twitter.com/704CAyX8tZ
— Ursula von der Leyen (@vonderleyen) May 24, 2021
