Premer-Ministr orynbasary – Saýda jáne integratsiia ministri Baqyt Sultanovtyń aitýynsha, dál qazir Qazaqstanda ettiń qymbattaýyna negiz joq, dep habarlaidy QazAqparat.
«Negizi mal sharýashylyǵymen ainalysatyn taýar óndirýshilermen, fermerlik qojalyq basshylarymen kezdeskende bári bir problemany aitady. Ettiń satyp alý baǵasy óte tómen. Ortasha alǵanda, tiri salmaqtaǵy ettiń bir kelisi 700-800 teńgeden aspaidy dep otyr. Sol sebepti mal sharýashylyqtarynyń negizgi problemasy - bastapqy satyp alý baǵasy óte tómen bolýynda. Baǵanyń ári qarai qalyptasýy saýda júielerine bailanysty. Baǵa sol jaqta ósip jatyr. Qazirgi tańda bizde ettiń baǵasy negizinen turaqty. Biyl et óndirý kóleminde de, mal basynda da ósim bar. Sol sebepti táýekel joq dep esepteimiz», - dedi ministr ortalyq kommýnikatsiialar qyzmetinde ótken brifingide.
Bul ýájdi Premer-Ministrdiń orynbasary – Saýda jáne integratsiia ministri Baqyt Sultanov ta qýattady.
«Et baǵasynyń ósýine eshqandai negiz joq. Deldaldar týraly aityp otyrsyz, búgingi tańda taýar óndirýshi fermerlerden ettiń baǵasy ortasha eseppen 900 teńgeden alynady. Ári qarai naryqqa jetkenshe monopoliialar, basqa da deldaldar,oligopoliialar arqyly baǵa ósip ketedi. Bul jaǵynan biz jumys istep jatyrmyz. Bazar ieleriniń, ákimshileriniń jaýapkershiligin arttyrý baǵytynda zańnamalyq ózgerister engizip jatyrmyz. Sondai-aq, jergilikti organdarmen birlesip, kishigirim saýda obektilerinde ústeme baǵany 15 paiyzdan asyrmaý týraly baǵytynda tiisti sharalar júrgizilip jatyr. Úidiń qasyndaǵy shaǵyn dúkenderdiń tiisti jaýapkershiligin arttyrý úshin qosymsha sharalar engiziledi», - dedi vitse-premer.
Buǵan deiin Úkimettiń keńeitilgen otyrysynda Memleket basshysy Qasym-Jomart Toqaev qant tapshylyǵyn rettei almaǵan Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeevke sógis jariialaǵan edi.
