Shymkentte Alǵys aitý kúni merekesi qarsańynda bastalǵan aptalyq búgin «Yqylas kúni» ataýymen jalǵasyn tapty. Bul kúni saiasi deportatsiia qasiretin bastan ótkizgen etnos ókilderiniń búgingi býyny, qiyn-qystaý jyldary pana bolyp, qoldaý kórsetken qazaqtardyń búgingi urpaqtary turatyn shańyraqtarǵa baryp, aqedil alǵysyn bildiredi. Máselen, túrik etnosynyń ókili Turymbek Osmanov búgin kezeńde ata-babalary pana tapqan Aqylbek Ahmetbai aqsaqaldyń otbasyna bardy. Bul týraly «Qazaq úni» aqparat agenttigi habarlaidy.
Zulamat jyldary baýyryna basyp, aiyryqsha qamqorlyq tanytqany úshin riasyz rizashylyǵyn bildirdi. Janyna qalalyq korei, grek, iran etnomádeni birlestikteri men «Yntymaq» etnosaralyq birlestiginiń jetekshilerin erte barǵan ol úi iesine dostyqtyń belgisi retinde arnaiy syilyq tartý etti.
– Solaqai saiasattyń saldarynan bizdiń ata-babalarymyz 1944 jyly Grýziianyń Ahysqa aimaǵynan qazaq jerine qonys aýdardy. 8 balasymen Shymkenttiń mańyndaǵy Qyzylsai aýylyna tap bolǵan bizdiń babalarymyz iaǵni Osmanovtar áýletin sol kezde Ahmetbai aqsaqal qabyldap, qorjyn tamynyń bir bólmesin usyndy. Ózderiniń basyndaǵy qiyn jaǵdaiǵa qaramastan bir úzim nanymen bólisip, ashtyqtan, aýrýdan tityqtaǵan halyqty aman alyp qaldy. Osyndai meiirimdiligi úshin qazaq halqyna sheksiz rizashyǵymdy bilderemin , – deidi túrik aqsaqaly T. Osmanov.
Qaitpas shaǵynaýdanynda turatyn qos áýlettiń urpaqtary búginde ósip-óngen. Bir týǵan baýyrlardai ózara tyǵyz qarym-qatynasta ómir súredi.
Alǵys aitý mekerekesin asyǵa kútetinderdiń biri – sheshen etnosynyń ókili Razvan Amachev. 1944 jyly sheshen-ingýsh halyqtary qazaq jerine deportatsiialanǵanda Ravzan aqsaqal 14 jasta bolǵan. Sheshen etnosynyń qazaqtardan kórgen jaqsylyǵyn nemerelerine únemi aityp otyrady.
Mereke qarsańynda ózderine qamqor bolǵan Toǵys aýylyndaǵy Ryskeldievterdiń otbasyna arnaiy baryp, shynaiy alǵysyn jetkizdi. Osy kúni qalaldaǵy 16 etnomádeni birlestikterdiń tóraǵalary da Shymkenttegi Qýatbek Qabylbekovtyń, Qýat Súieýbaevtyń, Ólmeshan Janybekovtyń otbasylaryna baryp, qazaq halqynyń jasaǵan jaqsylyǵyn eske aldy.
.jpeg)