Etnikalyq qazaqtarǵa Qazaqstan azamattyǵyn jeńildetilgen tártippen berý quqyǵyn kózdeitin zań jobasy biylǵy mamyr aiynda Májilis qaraýyna engiziledi. Bul jaiynda Májilis depýtattarynyń resmi saýalyna jaýap bergen QR Premer-Ministri Baqytjan Saǵyntaev aitty, dep habarlaidy "Ult aqparat".
Úkimet basshysynyń jaýabyna sáikes, kóshi-qon saiasatynyń problemalaryn keshendi sheshý maqsatynda Eńbek jáne halyqty áleýmettik qorǵaý ministrligi «Qazaqstan Respýblikasynyń keibir zańnamalyq aktilerine halyqtyń kóshi-qon protsesterin retteý máseleleri boiynsha ózgerister men tolyqtyrýlar engizý týraly» zań jobasynyń tujyrymdamasy ázirledi. Zań jobalaý qyzmeti máseleleri jónindegi vedomstvoaralyq komissiiasynyń 2018 jylǵy 16 qarashadaǵy 466-otyrysynda joba maquldandy.
«Atalǵan tujyrymdamada Qazaqstan Respýblikasyna kelgen etnikalyq repatrianttarǵa qolaily jaǵdailar jasaý, onyń ishinde oralman mártebesi joq nemese toqtatylǵan etnikalyq qazaqtarǵa Qazaqstanda turǵan merzimine qaramastan, Qazaqstan Respýblikasynyń azamattyǵyn jeńildetilgen tártippen alýǵa quqyq berý kózdelgen. Joǵaryda atalǵan zań jobasyn Qazaqstan Respýblikasy Parlamentiniń Májilisine 2019 jylǵy mamyr aiynda engizý josparlanǵan», - dedi Baqytjan Saǵyntaev.
