Foto: Gov.kz
Agrarlyq salaǵa kórsetilgen memlekettik qoldaý men atqarylyp jatqan jumystardyń nátijesinde Túrkistan oblysynda mal sharýashylyǵy turaqty damý ústinde. Elimizdegi iri qara mal sanynyń 13 paiyzy, qoidyń 22 paiyzy, jylqynyń 11 paiyzy, túieniń 19 paiyzy, óndirilgen ettiń 11 paiyzy, súttiń 13 paiyzy óńirdiń úlesinde, dep habarlaidy «Ult aqparat».
Oblystyq ákimdiktiń baspasóz qyzmetiniń málimetinshe, búgingi tańda oblysta 1 mln. 120 myń bas iri qara mal, 5 mln. 34 myń bas qoi, 474,7 myń bas jylqy, 43,9 myń bas túie, 2 mln. 167 myń bas qus bar.
Oblysta 7 aida 112,8 myń tonna et, 280,2 myń tonna sút, 143,6 mln. dana jumyrtqa óndirildi. Et eksporty boiynsha Túrkistan óńiri respýblikada kósh basynda. Eksportqa shyǵarylatyn iri qara mal etiniń 80%, qoi etiniń 75% oblystyń enshisinde. Biylǵy 7 aida 6,9 myń tonna IQM, 4,7 myń tonna qoi eti eksportqa shyǵaryldy.
Mal sharýashylyǵy ónimderiniń eksporttyq kólemin ulǵaitýda óńirde bordaqylaý alańdary men keshenderin júieli damytý oń septigin tigizip otyr. Oblysta jalpy 9183 iri qara mal bordaqylaý alańy bar. Onyń ishinde, 400 bastan - 1000 basqa deiin 13 birlik, 1000 bastan joǵary 22 birlik mal bordaqylaý alańynda 35 myń bas IQM bordaqylanýda.
Et eksportyn arttyrýda Sairam aýdany kásipkerleriniń jumysyn erekshe atap ótýge bolady. Atap aitqanda, 8 aida «Turan Agro Et-Sút» AShÓK-i 3500 tonna siyr etin jáne 1560 tonna qoi etin Ózbekstan eline eksporttasa, «Qaiyp ata» JShS 2 945 tonna siyr etin jáne 12 tonna qoi etin Ózbekstanǵa, 118 tonna qoi etin Iranǵa eksporttady. «Qaiyp ata» JShS Tájikstanmen 110 tonna et eksporttaý boiynsha kelisimshart jasady. Eksport osy aidan bastap júzege asyrylady.
Respýblikalyq delegatsiianyń Avstraliia eline jasaǵan issapary qorytyndysymen jalpy quny 55,2 mlrd. teńgege 5 iri investitsialyq jobany júzege asyrý kózdelýde. Sonyń ishinde «Qaiyp ata» JShS 3 iri investitsiialyq jobany júzege asyrmaq.
Atap aitqanda, 2025 jyly Arys qalasynda 25 myń IQM basyna arnalǵan bordaqylaý kesheni iske qosylady. Al 2025-2026 jyldary Sairam aýdanynda «1500 basqa arnalǵan iri qara maldy soiý jáne óńdeý» jobasy men «Mal satý birjasy» jobasy júzege asyrylady.
