Foto: Tengrinews.kz
Kókshetaýda taksi aqysyn tólemei ketken jolaýshy anyqtalyp, politsiiaǵa jetkizildi, dep habarlaidy Ult.kz.
26 qarashada áleýmettik jelilerde Astana–Kókshetaý baǵytynda kele jatqan taksiden aqy tólemei túsip ketken jolaýshy týraly aqparat taraǵan edi. Videomaterial kópshiliktiń qyzý talqysyna túsip, keń rezonans týdyrdy. Qoǵam narazylyǵyn týdyrǵan basty jait - taksi júrgizýshisiniń estý qabileti buzylǵany.
Quqyq buzýshylyqtyń qylmystyq nemese ákimshilik quramyna jatpaitynyna qaramastan, politseiler oqiǵaǵa jedel áreket etti. Jolaýshynyń kim ekenin anyqtap, ishki ister organdaryna jetkizýge baǵyttalǵan sharalar birden qolǵa alyndy.
Sol kúni politsiia Kókshetaýdyń 30 jastaǵy turǵynyn tapty. Onyń aitýynsha, ol 24 qarashada taksimen jolǵa shyqqan, alaida qarjylyq qiyndyqtarǵa bailanysty jol aqysyn tólemei kólikten shyǵyp ketken.
Quqyq qorǵaý qyzmetkerleri er adammen profilaktikalyq áńgime júrgizdi. Ol óziniń áreketine ókinip, sapar qunyn tolyq ótedi.
